Kanadaliq diplomatlarning tibetni ziyaret qilishi tosalghugha uchrap kelgen

Muxbirimiz irade
2016-10-06
Élxet
Pikir
Share
Print

Kanada tashqi ishlar ministiri sitifan di'on xitay hökümitining yillardin béri kanadaliq diplomatlarning tibetni ziyaret qilishi we u yerde ishqa kirishtürülgen bir qatar qurulush pilanlirining ehwalini közdin kechürüshige tosalghu bolup kelgenlikini éytqan.

Kanadada chiqidighan "Yer shari we mektuplar" gézitining xewer qilishiche, sitifan di'on bu sözni kanada parlamént ezalirigha bergen bir yazma bayanatida qilghan. U sözide, xitay da'irilirining kanadaliq diplomatlarning tibetni ziyaret qilish telipini ochuq-ashkara halda ret qilmisimu, emma ziyaret kinishkisi élishni qiyinlashturush, waqitni sozush qatarliq amallar bilen cheklep kelgenlikini, tibetke bérishke ruxset qilin'ghan teqdirdimu xitay da'irilirining ulargha xuddi sayidek egishiwalidighanliqini éytqan.

Xewerde éytilishiche, tibet aptonom rayonida kanadagha qarashliq "Xelq'ara tereqqiyat agéntliqi" yardem qilip ish bashlighan qurulush pilanliri bar iken. Emma xitaydiki kanada elchixana xadimliri bu qurulushning ehwalini körüsh üchün tibetke bérishigha izchil yol qoyulmighan. Montriyaldiki kanada tibet komitéti xitayning tibetke sayahet qilishni cheklesh arqiliq rayonda yürgüzüwatqan kishilik hoquq depsendichilikini yoshurushqa urunuwatqanliqini éytqan. Ottawada turushluq xitay elchixanisi bu heqtiki so'algha jawab bérishni ret qilghan.

Xelq'ara kishilik hoquq organliri ilgiri élan qilghan doklatlirida, Uyghur éli we tibetning chet'ellik ziyaretchiler, muxbirlarning bérishi eng qéyin bolghan jaylar ikenlikini, u yerge barghan muxbirlarningmu qattiq teqib we zorawanliqqa uchraydighanliqini qeyt qilghan idi.

Toluq bet