Хәлқарада етирап қилинмиған абхазийә вә җәнуби оссетийә каталонийә мустәқиллиқини етирап қилмақчи

Мухбиримиз үмидвар
2017-10-29
Елхәт
Пикир
Share
Принт

Кавказийәдики абхазийә вә җәнуби оссетийә җумһурийәтлири һөкүмәтлири каталонийәниң мустәқиллиқини етирап қилишқа тәйярлиниватқанлиқини билдүргән.

Русийәниң «комсомол һәқиқити» гезитидә елан қилинған бу һәқтики учурға қариғанда, җәнубий оссетийә ташқи ишлар министири дмитрий медойев җәнуби оссетийәниң каталонийә мустәқиллиқини етирап қилиш мәсилини муһакимә қилишқа тәйяр икәнлики вә һазир вәзийәтни көзитиватқанлиқини билдүргән. 

Буниңдин башқа йәнә абхазийә һөкүмитиму каталонийәниң мустәқиллиқини етирап қилишқа тәйяр икәнликини билдүргән, абхазийә ташқи ишлар министирлиқи вәкили 2014-йилидин тартип, каталонийәдә паалийәт қилмақта икән. Абхазийә муавин ташқи ишлар министири өз җумһурийитиниң каталонийәниң мустәқиллиқини етирап қилишқа тәйяр икәнликини билдүргән. 

Хәвәрләрдин мәлумки, абхазийә вә җәнуби оссетийә әслидә грузийә тәвәликидики аптоном җумһурийәтләр болуп, 1990-йилларда русийәниң қоллиши астида мустәқиллиқ җакарлиған вә 2008-йили, русийә тәрипидин етирап қилинған. Әмма улар, һазирғичә, русийә вә бир қанчә дөләттин башқа чоң дөләтләрниң вә б д т ниң етирап қилишиға еришәлмәй кәлмәктә, һәтта русийәниң әң йеқин иттипақдиши хитайму русийә тәрәпниң еһтияҗини чәткә қайрип, мәзкур икки җумһурийәтниң мустәқиллиқини тонумиған иди. Хитай бу қетим йәнә каталонийәниң мустәқил болушиғиму қарши позитсийисини билдүргән.

Каталонийә, мустәқиллиқ җакарлиғандин буян һазирғичә, һечқандақ бир дөләт вә явропа иттипақи яки б д т техи каталонийә мустәқиллиқини етирап қилидиғанлиқини җакарлимиған. 

Б б с агентлиқиниң хәвәр қилишичә, каталонийә мустәқиллиқ җакарлиғандин кейин, кризис техиму еғирлашқан болуп, испанийә юқири палатаси каталонийә аптоном һөкүмитини һәм бу һөкүмәт башлиқиниң вәзиписини бикар қиливетип, бу җайни биваситә башқуруш астиға алғанлиқини елан қилди. Әмма йәкшәнбә күни вәзиписидин қалдурулған каталонийә аптоном һөкүмити рәиси карлес пучдемон өзиниң бу районниң мустәқиллиқи үчүн қәтий күрәш қилидиғанлиқини җакарлиған.

Пикирләр (0)
Share
Толуқ бәт