Каталонийә мустәқиллиқ җакарлиғандин кейин испанийәдә вәзийәт кәскинләшкән

Мухбиримиз қутлан
2017-10-28
Елхәт
Пикир
Share
Принт

Испанийәниң каталонийә аптоном өлкиси 27-өктәбир күни омумий хәлқниң аваз бериши арқилиқ испанийәдин айрилип мустәқил болғанлиқини җакарлиди.

Каталонийәниң мустәқиллиқ җакарлиши мадрид даирилирини җиддийләштүргән вә испанийәдә вәзийәтниң бирдинла кәскинлишишини кәлтүрүп чиқарған.

Каталонийә парламенти мустәқиллиқ җакарлап бирқанчә саәт өтмәйла испанийә парламенти инкас қайтуруп, испанийәниң каталонийәни биваситә контрол қилишини тәләп қилған.

«Мустәқиллиқ» гезитиниң илгири сүрүшичә, испанийә баш министири раҗой дәрһал буйруқ чүшүрүп, каталонийә аптоном һөкүмитини бикар қилғанлиқини, каталонийә президенти карлес пугдемунт билән муавин президент ориол җункурасни вәзиписидин қалдурғанлиқини билдүргән.

Испанийә мәркизий һөкүмити йәнә каталонийәдә қайта сайлам елип берилғучә болған арилиқта мәзкур районни биваситә контрол қилидиғанлиқини илгири сүргән.

Шу күни испанийәниң малийә министирлиқи каталонийәгә мунасивәтлик дөләт расхотлирини вақитлиқ тохтитидиғанлиқини билдүргән. Каталонийәдики мустәқиллиқни тәләп қиливатқан аһалиләр буниңға инкас қайтуруп, испанийә һөкүмитигә бундин кейин баҗ тапшурмайдиғанлиқини ейтқан.

Көзәткүчиләр, испанийә даирилири билән каталонийә оттурисида тоқунуш келип чиқишидин әндишә қиливатқанлиқини билдүргән. явропа иттипақи каталонийәниң испанийәдин айрилип мустәқиллиқ җакарлишиға нисбәтән соғуқ инкаста болған. явропа парламентиниң рәиси антонио таҗани: «явропа иттипақидики һечким каталонийәниң мустәқиллиқ хитабнамисини тонумайду,» дегән.

Толуқ бәт