Kataloniye musteqilliq jakarlighandin kéyin ispaniyede weziyet keskinleshken

Muxbirimiz qutlan
2017-10-28
Élxet
Pikir
Share
Print

Ispaniyening kataloniye aptonom ölkisi 27-öktebir küni omumiy xelqning awaz bérishi arqiliq ispaniyedin ayrilip musteqil bolghanliqini jakarlidi.

Kataloniyening musteqilliq jakarlishi madrid da'irilirini jiddiyleshtürgen we ispaniyede weziyetning birdinla keskinlishishini keltürüp chiqarghan.

Kataloniye parlaménti musteqilliq jakarlap birqanche sa'et ötmeyla ispaniye parlaménti inkas qayturup, ispaniyening kataloniyeni biwasite kontrol qilishini telep qilghan.

"Musteqilliq" gézitining ilgiri sürüshiche, ispaniye bash ministiri rajoy derhal buyruq chüshürüp, kataloniye aptonom hökümitini bikar qilghanliqini, kataloniye prézidénti karlés pugdémunt bilen mu'awin prézidént ori'ol junkurasni wezipisidin qaldurghanliqini bildürgen.

Ispaniye merkiziy hökümiti yene kataloniyede qayta saylam élip bérilghuche bolghan ariliqta mezkur rayonni biwasite kontrol qilidighanliqini ilgiri sürgen.

Shu küni ispaniyening maliye ministirliqi kataloniyege munasiwetlik dölet rasxotlirini waqitliq toxtitidighanliqini bildürgen. Kataloniyediki musteqilliqni telep qiliwatqan ahaliler buninggha inkas qayturup, ispaniye hökümitige bundin kéyin baj tapshurmaydighanliqini éytqan.

Közetküchiler, ispaniye da'iriliri bilen kataloniye otturisida toqunush kélip chiqishidin endishe qiliwatqanliqini bildürgen. Yawropa ittipaqi kataloniyening ispaniyedin ayrilip musteqilliq jakarlishigha nisbeten soghuq inkasta bolghan. Yawropa parlaméntining re'isi antoni'o tajani: "Yawropa ittipaqidiki héchkim kataloniyening musteqilliq xitabnamisini tonumaydu," dégen.

Toluq bet