Кәримофниң қизи гүлнарә кәримованиң тутқун қилинғанлиқи рәсмий билдүрүлди

Мухбиримиз үмидвар
2017-08-06
Елхәт
Пикир
Share
Принт

Йеқинда сабиқ өзбекистан президенти, мәрһум ислам кәримофниң чоң қизи гүлнарә кәримованиң өзбекистан сақчи даирилири тәрипидин тутқун қилинғанлиқи һәққидики учурлар тарқалғандин кейин, өткән чаршәнбә күни өзбекистан баш тәптиш мәһкимиси униң тутқун қилинғанлиқини рәсмий дәлиллиди.

Фәрғанә учур ториниң өзбекистан учур мәнбәлири асасида тарқатқан хәвәрлиридә илгири сүрүлүшичә, гүлнарә кәримова һазир өзбекистан миллий бихәтәрлик оргининиң айрип тәкшүрүш орнида тутуп турулмақта.

Оттура асия учур ториниң хәвәрлиридә көрситилишичә, өзбекистан тәптиш даирилири техи һазирғичә мәрһум өзбек президентиниң чоң қизи үстидин қачан сот ечилидиғанлиқи вә униң қандақ җинайәт гуманлири билән тутқун қилинғанлиқи һәққидә изаһат бәрмигән.Әмма, көзәткүчиләр гүлнарә кәримованиң 2015-йили, 21-авғуст күни ташкәнт соти чиқарған бәш йиллиқ қамақ җазасиға һөкүм қилиш делосиға асасән тутулғанлиқини җәзм қилмақта.

Гүлнарә кәримова бу қетим йәнә қайтидин, алдамчилиқ, чәтәл пуллирини йошуруш, таможна қануни вә сода низамлирини бузуш, җинайәт арқилиқ тапқан пуллирини қанунлаштуруш қатарлиқ бир йүрүш җинайәтләр билән әйиблиниши мумкин икән.

45 яшлиқ гүлнарә кәримова бир мәзгил америкида оқуған вә яшиған. 2008-2013-Йиллири арисида у өзбекистандики әң тәсири күчкә игә сиясийон вә тиҗарәт адимигә айланған болуп, һәтта униң кәлгүсидә дадисиниң орниға өзбекистан президенти болуши еһтималлиқи һәққидики пәрәзләрму оттуриға чиққан, бирақ кейин униң дадиси билән болған мунасивити бузулған һәмдә 2015-йили униңға бәш йиллиқ қамақ җазаси һөкүм қилинған иди. Мана әмди ислам кәримоф вапатиға бир йил тошуш алдида у рәсмий түрдә тутқун қилинди.

Пикирләр (0)
Share
Толуқ бәт