Кәшмир һөрийәт йиғининиң рәиси гелани: «пакистан вә ислам һәмкарлиқ тәшкилатиниң уйғурлар үчүн сөзләш мәсулийити бар»

Мухбиримиз әркин
2019-06-10
Елхәт
Пикир
Share
Принт

Һиндистан контроллуқидики кәшмирдики «һөрийәт йиғини» намлиқ сиясий партийә вә иҗтимаий гуруһларниң бирләшмә оргини хитайниң уйғурларға тутқун муамилисини тәнқидләп, пакистан билән ислам һәмкарлиқ тәшкилатиниң уйғурлар үчүн сөзләш мәсулийити барлиқини билдүргән. Бу сөзләрни пакистан һөкүмити уйғурларниң тәқдиригә көз юмувалған бир мәзгилдә һиндистан контроллуқидики кәшмирдики бир мусулман тәшкилатиниң қилиши хәлқара таратқуларниң диққитини қозғиди.

Өзлирини дунядики мусулманларниң һаммиси, дәп келиватқан пакистан вә сәуди әрәбистан қатарлиқ дөләтләрниң хитайниң 2 милйондәк мусулманни йиғивелиш лагерлириға қамап, уларниң мәдәнийити вә диний етиқадини чәклишигә сүкүт қилиши ғәрб демократик дөләтлириниң вә хәлқара кишилик һоқуқ тәшкилатлириниң қаттиқ тәнқидигә учрап кәлгәниди. «Оттура шәрқ вә шималий африқа малийә тори» намлиқ тор журнилиниң хәвәр қилишичә, кәшмир «һөрийәт йиғини» ниң рәиси сәйт али шаһ гелани йеқинда хитайниң уйғур мусулманлириға қаратқан бастурушини «һәқсизлиқ, ғәйрий инсанийлиқ» дәп әйибләп, «хитай даирилириниң уйғур мусулманлириға тутқан рәһимсиз муамилиси көп санлиқниң зулуми вә диний өчмәнликниң әң йиргинчлик шәкли. Бу һәр бир виҗданлиқ инсанниң омуртқисини силкивәткүдәк һадисә» дегән. Гелани йәнә пакистан даирилирини вә ислам һәмкарлиқ тәшкилатини агаһландуруп, уларниң «бастурушқа учраватқан қериндаш уйғур әркәк-аяллар үчүн сөзләш мәсулийити бар» лиқини тәкитлигән. Хәвәрдә қәйт қилинишичә, пакистан билән ислам һәмкарлиқ тәшкилати кәшмирниң «өз тәқдирини өзи һәл қилиш» һәрикитини қоллап келиватқан болсиму, лекин геланиниң уйғурлар һәққидики сөзи униң принсип вә ислами әһкамларда чиң турғанлиқини көрситидикән. 

Хәвәрдә йәнә уйғурларниң трагедийәси кәшмир үчүн, болупму пакистан билән ислам һәмкарлиқ тәшкилати һиндистанниң б д т ниң кәшмир һәққидики қарарлирини иҗра қилишиға түрткә болиду, дәп қарайдиғанлар үчүн бир савақ икәнликини тәкитлигән.

Пикирләр (0)
Share
Толуқ бәт