Xelq'aradiki on nechche teshkilat xelq'ara jem'iyetni xitayning kishilik hoquq depsendichilikige chare qollinishqa chaqirdi

Muxbirimiz erkin
2019-09-09
Élxet
Pikir
Share
Print

Xelq'ara kechürüm teshkilati, xelq'ara zasidatillar komitéti, dunya Uyghur qurultiyi qatarliq on nechche kishilik hoquq teshkilati 9-séntebir küni ochuq xet élan qilip, xelq'ara jem'iyetni xitayning kishilik hoquq depsendichilikige qarshi ünümlük chare qollinishqa chaqirdi.

Ochuq xette, xitayda kishilik hoquqning depsende qilinishi sistémiliq ré'alliq ikenliki, kishilik hoquqning keng kölemlik we sistémiliq depsende qiliniwatqanliqi b d t höjjetliride qeyt qilin'ghanliqi eskertilip, b d t ning buninggha qarshi ünümlük bir chare-tedbir qollinishi, her qaysi el hökümetlirining xitay bilen bolghan qanun bilen bashqurush jehettiki hemkarliqini toxtitishi kérekliki tekitlen'gen.

Ochuq xette, bu yil 6‏-ayda 20 nechche döletning b d t kishilik hoquq komissari we kishilik hoquq kéngishi prézidéntini xitayning "Qayta-terbiyelesh lagérliri" ni ishqa sélip, Uyghur we bashqa musulmanlarni nishan'gha alghanliqi toghrisida agahlandurghanliqi, shundaqla xitaydin téz, musteqil we cheklimisiz tekshürüsh élip bérishni telep qilghan bolsimu, lékin xitayning buni ret qilghanliqi tekitlen'gen.

Ochuq xette yene, xitay hökümitining oxshimighan qarashlarni térrorluq, aghdurmichiliq we dölet bixeterlikige tehdit, dep xaraktérlendürüp, Uyghur we tibetlerni basturushta qollan'ghan taktikilirini emdi xongkongda ishlitiwatqanliqi bildürülgen. Ochuq xette qeyt qilinishiche, xelq'ara jem'iyet bolupmu b d t kishilik hoquq kéngishi xitay hökümitining kishilik hoquq depsendichilikige uchrighan shahitlarni qollishi, mumkin bolghan barliq charilerni ishqa sélip, uninggha kishilik hoquq mejburiyitini ada qilish heqqide bésim ishlitishi kérekliki körsitilgen. Ochuq xette yene, her qaysi el hökümetlirining xitay hökümiti b d t kishilik hoquq méxanizmining alaqidar tewsiyelirini ijra qilmighuche uning bilen bolghan qanun sahesidiki hemkarliqini toxtitishi kérekliki tekitlen'gen. Mezkur ochuq xet b d t kishilik hoquq kéngishining 42‏-nöwetlik yighini bashlan'ghan küni élan qilindi. Melum bolushiche, mezkur yighin 27‏-séntebirge qeder dawam qilidiken.

Toluq bet