Б д т баш катипи антонию уйғур мәсилиси һәққидики соалға «кишилик һоқуққа һөрмәт қилиш интайин муһим» дәп җаваб бәргән

Мухбиримиз ирадә
2019-11-27
Елхәт
Пикир
Share
Принт

Бирләшкән дөләтләр тәшкилатиниң баш катипи антонию гутерәс германийәдики зиярити мәзгилидә мухбирларниң уйғурлар һәққидики соалиға җаваб бәргән.

«Германийә авази» радийосиниң хәвәр қилишичә, гутерәс германийәдә тор қурулуши бихәтәрликигә мунасивәтлик бир йиғинға қатнишиватқан болуп, мухбирларни күтүвелиш йиғинида «германийә авази» ниң мухбири униңдин уйғур елиниң вәзийити һәққидики инкасини сориған.

У буниңға җавабән «кишилик һоқуққа һөрмәт қилишниң интайин муһимлиқи» ни тәкитлигән. У мундақ дегән: «дөләт сиясити чоқум аз санлиқ милләтләрни өзлириниң миллий кимликигә һөрмәт қилиниватқанлиқини һес қилдуруши керәк. Бу интайин муһим. Болупму шинҗаңдикидәк алаһидә әһвалларда техиму муһим. Дуняниң башқа җайлиридиму шундақ.»

Бирләшкән дөләтләр тәшкилатиниң баш катипи антонию гутерәс уйғур мәсилисидә хитай һөкүмитигә йетәрлик бесим ишләтмәслик билән тәнқидлинип келиватқан шәхс иди. Бу йил сентәбирдә хәлқара кишилик һоқуқни көзитиш тәшкилати, кәчүрүм тәшкилати, хәлқара кишилик һоқуқ бирләшмиси, қануншунаслар кеңиши вә дуня уйғур қурултийи қатарлиқ тәшкилатлар бирликтә гутересқа хәт йезип, уни хитай һөкүмитиниң уйғур елидә йолға қойған лагерлириға қарши аваз чиқиришқа чақирған шундақла униң та бүгүнгичә уйғур мәсилисидә сүкүт қилғанлиқини әйиблигән иди. Һалбуки, гутерес тәнқидләрни қаттиқ рәт қилип, өзиниң бу йил 4-айда хитайға қилған зиярити мәзгилидә уйғурларниң мәсилисини очуқ-ашкара тилға алғанлиқини илгири сүргән.

Пикирләр (0)
Share
Толуқ бәт