Кишилик һоқуқ органлири хитай һөкүмитини илһам тохтини қоюветишкә чақирди

2014-07-31
Елхәт
Пикир
Share
Принт

Дунядики кишилик һоқуқ тәшкилатлири вә уйғур тәшкилатлири хитай һөкүмитини уйғур зиялийси илһам тохтини дәрһал қоюветишкә чақирди. Чаршәнбә күни хитай даирилири уйғур зиялийси илһам тохтини рәсмий һалда «дөләтни парчилашқа урунуш» җинайити билән әйиблигән иди. Кишилик һоқуқни көзитиш тәшкилати бүгүн елан қилған мәхсус баянатида, хитай һөкүмитиниң бу «асассиз» әйибнамисидин қаттиқ биарам болғанлиқини билдүрди. Улар, уйғур елида вәзийәт қаттиқ кәскин болуватқан бир пәйттә, уйғур зиялийсиниң бөлгүнчилик билән әйиблиниши уйғурларға сәлбий сегнал бериду, дәп әскәртти.

Бүгүн йәнә, дуня уйғур қурултийи баянатчиси дилшат ришитму хәлқара мәтбуатларға баянат берип, хитай һөкүмитиниң илһам тохти мәсилисидики позитсйисини әйиблиди. У, хитай һөкүмитини дәрһал бу хата қәдимидин қайтишқа чақирди. Дилшат ришит, илһам тохтиниң қолға елиниши пүтүнләй сиясий бир қарар, у һечқандақ бир қанунға уйғун әмәс, деди.

Илһам тохти мәсилисини йеқиндин көзитип келиватқан бир қиисм көзәткүчиләр өз мулаһизилиридә илһам тохтиниң бирдин - бир җинайитиниң хитай һөкүмитини әйнәккә қарап беқишқа дәвәт қилиштин ибарәт икәнликини билдүрди. Кишилик һоқуқни көзитиш тәшкилати хитай ишлири дериктори софи ричардсон баянатида, илһам тохтиға охшаш тинч йол билән уйғурларниң мәсилилирини тилға елип кәлгән бир кишини җимиқтуруш һәргизму районға муқимлиқ елип кәлмәйду, деди.

Пикирләр (0)
Share
Толуқ бәт