Брет стефенс: «коммунизм үмидигә алданмаслиқимиз лазим!»

Мухбиримиз әзиз
2017-10-31
Елхәт
Пикир
Share
Принт

Дунядики коммунизм һәрикитиниң җәңгаһлиридин болған русийәдә сотсиялизм орнитишни мәқсәт қилған «өктәбир инқилаби» партлиғанлиқиниң 100 йиллиқ хатирисидә америкидики «ню йорк почтиси» гезитиниң обзорчиси прет стефенс мақалә елан қилип, техичә коммунизм ғайисигә мәстхуш болуп йүргәнләрни ойғинишқа чақирди.

Мақалидә көрситилишичә, сталин дәвридин башлап коммунистик түзүм астида милйонлиған кишиләр «тазиланған», қирим татарлири юртлиридин һәйдәп чиқирилған, бреҗнев дәвридә болса сансизлиған өктичиләр қийнақта һаятидин айрилған. Хитайдики «чоң сәкрәп илгириләш» һәрикитиму шуниңға охшаш нәтиҗә көрүлгән. Әмма бу қилмишларниң һәммисини даириләр «ачарчилиқ» ниң нәтиҗисигә дөңгәп қутулған.

Апторниң баян қилишичә, көплигән кишиләр һелиһәм коммунизм билән натсистлиқниң бир-биридин түптин пәрқлиқ икәнликидә чиң турмақта икән. Уларниң пикричә коммунизмда синипий өчмәнлик тәкитләнсә, натсистлиқта ирқий өчмәнлик муһим орун тутидикән. Улар шу арқилиқ коммунизм дунясидики зулум вә зор көләмлик қирғинчилиқни ақлаш мәвқәсидә икән.

Аптор өзиниң бу хил қарашқа қошулмайдиғанлиқини билдүрүп, һелиһәм зор сандики зиялийлар вә сиясийонларниң ашу хилдики коммунизм террорлуқи вә һакиммутләқлиқигә һәвәс қилип келиватқанлиқини, һалбуки буниң инсанийәтниң кәлгүси үчүн зор бала-қаза болуш мумкинликини тәкитләйду.

Аптор ахирида йәршари аһалисиниң үчтин бир қисмини қул қилған һәмдә шу инсанларни чәксиз азаб-оқубәткә муптила қилған коммунизм дунясиниң урушсиз гүмүрүлүп чүшкәнликини көрүп туруқлуқ, һазирқи заман инсанлириниң бу түзүмни әйибләштин даҗиватқанлиқини тәнқидләйду. Шуниңдәк ашу түзүмниң қурбанлириға һесдашлиқ қилиш лазимлиқини тәкитләйду.

Пикирләр (0)
Share
Толуқ бәт