Xitay da'iriliri korla shehirige sün'iy eqil tejribixanisi qurghan

Muxbirimiz jüme
2018-02-03
Élxet
Pikir
Share
Print

Xitayning Uyghur élide kölemleshtürgen kompyutér arqiliq teqib qilish we chiray tonush téxnikisi xelq'ara axbaratlarda gholghila qozghighan bir mezgilde xitay da'iriliri korla shehirige sün'iy eqil emeliy téxnologiyisi tejribixanisini resmiy qurughanliqini ashkarilidi. "Sina" ning "Xitay xewerler tori" din neqil élip xewer qilishiche, tejribixana korla shehiridiki iqtisadiy tereqqiyat rayonigha yasalghan.

Xewerge qarighanda mezkur tejribixana xitay kompartiyisi 19-qurultiyining "Tinch xitay qurush, jem'iyetni idare qilishini kücheytish, jem'iyet muqimliqi we inaqliqni qoghdash we döletning uzun mezgillik eminliki kapaletke ige qilish körsetmisi" ge awaz qoshush üchün qurulghan. 

Xewerge qarighanda, yéqinda xitay dölet ishlar mehkimisi "Yéngi dewridiki sün'iy eqil tereqqiyat pilani" namliq bir höjjet tarqatqan.

Korla da'iriliri xitay hökümiti yuqirida tarqatqan höjjetke maslashqan halda korla shehiride qurulghan tejribixana arqiliq atalmish "Bir gewdileshken urush qomandanliq supisi" ning süretlik perqlendürüsh we sün'iy eqil bilen charlap bashqurush rolini toluq jari qildurush meqsitige yetmekchi bolghan. 

Tejribixanini korla iqtisadiy tereqqiyat rayonini bashqurush hey'iti, chungching penler akadémiyesige qarashliq pen téxnika tereqqiyat shirkiti, xitay penler akadémiyesi chungching yéshil sün'iy eqil téxnologiyisi tetqiqat orni qatarliqlar biliship qurghan.

Ilgiri gherb metbu'atlirida élan qilghan xewerlerde xitay xewpsizlik da'irilirining Uyghur élini sün'iy eqil bilen chiray perqlendürüsh tejribixanisigha aylandurghanliqi körsitilgen. 

En'gliyedin chiqidighan "Muhapizetchi" géziti bu heqtiki bir xewiride Uyghur élige ornitilghan közitish apparatlirining közitish obyékti xizmet orni we öz öyidin 300 métir yiraqlighan haman munasiwetlik organlargha agahlandurush yetküzidighanliqini xewer qilghan idi.

Toluq bet