Археологлар крорандин 2000 йил бурунқи бир шәһәр харабисини тапти

Мухбиримиз әркин
2017-03-31
Елхәт
Пикир
Share
Принт

Археологлар йеқинда көнчи дәрясиниң шималидин бир қәдими шәһәр харабисини тапқан. Археологларниң билдүрүшичә, харабиликниң орни шиветсийәлик сәйяһ свен һедин 1900‏-йили байқиған кроран харабиликидин 57 километир йирақтикән. Хитай «йәр шари вақти гезити» археологларниң сөзини нәқил кәлтүрүп, бу харабилик кроран дөлитиниң пайтәхти болуши мумкинликини билдүрди.

«Шәрқтики помпей» дәп аталған кроран қәдимдә бир мәзгил йипәк йолиниң муһим сода түгүни болған. Археологларниң хитай ахбаратиға билдүрүшичә, бу харабиликниң шәкли юмилақ болуп, сепил билән қоршалғаникән. Археологлар харабиликниң диаметири 300 метир, уни қоршап турған сепилниң бәзи җайлириниң фондаменти 2.2 Метир, бәзи җайлириниң 2.7 Метир келидиғанлиқини, қелип қалған әң егиз сепил харабисиниң 2.5 Метир әтрапида икәнликини билдүргән.

Крорандики қәдимий шәһәр харабисиниң хәвири уйғур аптоном районлуқ партком секретари чен чүәнго йеқинда археологийә йиғини чақирип, «археологийә хизмити шинҗаңниң әзәлдин тартип җуңго земини икәнликини испатлашқа хизмәт қилиши керәк» дегәндин кейин елан қилинди.

Чен чүәнгониң сөзи чәтәлдики бәзи тарих, мәдәнийәт тәтқиқатчилириниң қаттиқ тәнқидигә учриған. Америкида турушлуқ хитай тарихшунас җу шөйүән, чен чүәнгониң сөзини «илмий тәтқиқат әркинликигә қилинған бузғунчилиқ» дегән иди.

Уйғур аптоном районлуқ археологийә институтиниң археологи ху шиңҗүн, йеңи тепилған харабиликниң буниңдин 2000 йил бурунқи дәвргә аит икәнлики, униң милади 7-әсир билән 9‏-әсир арилиқида ғайиб болғанлиқини билдүргән. Әгәр униң сөзи тоғра болса, бу дәвр көк түрк ханлиқиниң ахирқи, қараханийлар билән идиқут дөлитиниң дәсләпки дәврлиригә тоғра келиду.

Толуқ бәт