Arxé'ologlar krorandin 2000 yil burunqi bir sheher xarabisini tapti

Muxbirimiz erkin
2017-03-31
Élxet
Pikir
Share
Print

Arxé'ologlar yéqinda könchi deryasining shimalidin bir qedimi sheher xarabisini tapqan. Arxé'ologlarning bildürüshiche, xarabilikning orni shiwétsiyelik seyyah swén hédin 1900‏-yili bayqighan kroran xarabilikidin 57 kilométir yiraqtiken. Xitay "Yer shari waqti géziti" arxé'ologlarning sözini neqil keltürüp, bu xarabilik kroran dölitining paytexti bolushi mumkinlikini bildürdi.

"Sherqtiki pompéy" dep atalghan kroran qedimde bir mezgil yipek yolining muhim soda tügüni bolghan. Arxé'ologlarning xitay axbaratigha bildürüshiche, bu xarabilikning shekli yumilaq bolup, sépil bilen qorshalghaniken. Arxé'ologlar xarabilikning di'amétiri 300 métir, uni qorshap turghan sépilning bezi jaylirining fondaménti 2.2 Métir, bezi jaylirining 2.7 Métir kélidighanliqini, qélip qalghan eng égiz sépil xarabisining 2.5 Métir etrapida ikenlikini bildürgen.

Krorandiki qedimiy sheher xarabisining xewiri Uyghur aptonom rayonluq partkom sékrétari chén chüen'go yéqinda arxé'ologiye yighini chaqirip, "Arxé'ologiye xizmiti shinjangning ezeldin tartip junggo zémini ikenlikini ispatlashqa xizmet qilishi kérek" dégendin kéyin élan qilindi.

Chén chüen'goning sözi chet'eldiki bezi tarix, medeniyet tetqiqatchilirining qattiq tenqidige uchrighan. Amérikida turushluq xitay tarixshunas ju shöyüen, chén chüen'goning sözini "Ilmiy tetqiqat erkinlikige qilin'ghan buzghunchiliq" dégen idi.

Uyghur aptonom rayonluq arxé'ologiye institutining arxé'ologi xu shingjün, yéngi tépilghan xarabilikning buningdin 2000 yil burunqi dewrge a'it ikenliki, uning miladi 7-esir bilen 9‏-esir ariliqida ghayib bolghanliqini bildürgen. Eger uning sözi toghra bolsa, bu dewr kök türk xanliqining axirqi, qaraxaniylar bilen idiqut dölitining deslepki dewrlirige toghra kélidu.

Toluq bet