Xitayning lagérlarda Uyghur tutqunlirigha "Changchile" ögitiwatqanliqi melum boldi

Muxbirimiz erkin
2018-12-31
Élxet
Pikir
Share
Print

Xitay hökümiti xelq'ara jem'iyetning Uyghur aptonom rayonidiki lagérlargha qaratqan tenqidini ret qilip, uninggha qarita özining teshwiqatini dawamliq kücheytmekte. Xitay merkizi téléwiziye qanilining "Sherq waqti" programmisi 30‏-dékabir küni lagérlar heqqide programma tarqitip, lagérdiki bezi Uyghur tutqunlirini ziyaret qilghan. Programmida tutqunlar özlirining lagérdiki hayatining renggareng we mol mezmunlargha ige ikenlikini tekitligen. Teywen merkizi agéntliqining xewer qilishiche, programmida peyziwat nahiyisidiki bir lagérda tutup turuluwatqan abdulla abduréhim isimlik tutqun özining lagérda "Jingjü tiyatiri" ni öginip, xitayning changchile oyuni "Yang guyféy" ni orundashni ögen'genlikini bildürgen. U özining burunqi turmushining "Bek rengsiz" liki, lagérdiki hazirqi turmushining "Renggareng" liqini bildürüp, "Hazirqi turmush halitini bek yaxshi kördüm" dégen.

Xitay merkizi téléwiziye qanilining mezkur programmisi xelq'ara jem'iyet xitayning bir milyondin artuq Uyghurni yighiwélish lagérlirigha qamap, Uyghur medeniyiti, ana tili we diniy étiqadini cheklishini "Étnik tazilash", "Medeniyet qirghinchiliqi" dep eyiplewatqan mezgilde tarqitildi. Teywen merkizi agéntliqining xewiride körsitilishiche, programmida 29 yashliq abdisemet isimlik yene bir tutqun özining "Kespiy terbiyilesh merkizige kirip, terbiyiliniwatqanliqigha intayin xursenliki" ni bildürgen. Programmida yene bezilerning ayaq zawutigha kirip ishlewatqanliqi, éyigha 2800 ming yüen ma'ash alidighanliqi ilgiri sürülgen. Buning aldida bezi xelq'ara taratqular xitayning rayondiki lagérlarda ishlepchiqirish séxlirini qurup, tutqunlarni mejburi emgekke séliwatqanliqini ashkarilighan. Yéqinda amérikining soda shirkiti xotendiki bir lagérda ishlepchiqirilghan tenterbiye kiyimlirini import qilip, amérika bazirigha salghanliqi üchün qattiq tenqidke uchrighan. Amérikidiki nurghun aliy mektepler bu shirketning mehsulatini sétishni chekligen idi.

Toluq bet