Лагерлар мәсилиси давамлиқ хәлқараниң диққитидә болмақта

Мухбиримиз әзиз
2019-09-10
Елхәт
Пикир
Share
Принт

Хитай һөкүмити уйғур дияридики лагерлардики адәмләрниң мутләқ көпини қоюп бәргәнликини вә лагерларниң тақалғанлиқини ейтқан болсиму, хәлқарада бу һәқтики гуман вә рәддийәләр һәққидә көпләп пикирләр оттуриға чиқмақта.

9-Сентәбир күни америкадики «йәр шари почтиси» торида елан қилинған руни стенберг имзасидики мәхсус мақалида хәлқараниң лагерлар һәққидики гумани йәнә бир қетим системилиқ оттуриға қоюлди.

Мақалида көрситилишичә, хитай һөкүмитиниң «лагерлар тақалди» дегән мәзмундики баянлириниң раст-ялғанлиқи қанчилик болушидин қәтийнәзәр мушуниң өзи хитай һөкүмитиниң лагерларни «давамлиқ иҗра қилишқа болидиған тәдбир әмәскән» дәп тән алғанлиқиниң бир ипадиси икән. Чүнки лагерлар мәсилиси бойичә хитай һөкүмитиниң хәлқара ахбаратта йүзи төкүлүши, дипломатийә җәһәттә бесимлар вә тәнқидләргә дуч келиши, шуниңдәк иқтисадий җәһәттә бир қатар путликашаңларға учриши аллиқачан хитай һөкүмитини обданла «тәрләткән».

Апторниң қаришичә, нөвәттә «лагердин чиқти» дәп қаралған кишиләрниң мутләқ көп қисми завутлардики пүтүнләй яки қисмән һәқ берилмәйдиған мәҗбурий әмгәк күчлиригә айландуруветилгән. Бу завутларниң мәһсулатлири болса явропа вә америкадики бир қисим ширкәтләрниң хитай билән болидиған содиси үчүн ишлитилидикән.

Аптор ахирида лагерлар һәққидә хәлқара дуняниң охшаш болмиған икки қутупқа айрилиши һәққидә тохтилип: «хитайниң шинҗаң районидики қаттиқ қол сияситини әйибләш һиндистанниң кәшмиргә қол тиқиши, исраилийәниң пәләстиндики қилмишлири яки түркийәниң курдларға һуҗум қилишини тәнқидләш билән түптин пәрқлиқ болған һадисә» дәйду.

Пикирләр (0)
Share
Толуқ бәт