Хитай «террорлуқ» қа қарши лазирлиқ қорал ишлитидикән

Мухбиримиз әркин
2017-10-13
Елхәт
Пикир
Share
Принт

Хитай ахбарат васитилириниң ашкарилишичә, хитай аманлиқ күчлири буниңдин кейин «террорлуқ» қа арши туруш һәрикәтлиридә лазирлиқ қорал ишлитидикән. Даириләр йеқинда бу хил лазирлиқ қорални хитайниң хенән өлкисидә өткүзүлгән бир қетимлқи террорлуққа қарши туруш маниверида көргәзмигә қойған.

«Иқтисад вақти» намлиқ бекитиниң 13‏-өктәбир күни «йәр шари вақит гезити» дин нәқил кәлтүрүп хәвәр қилишичә, мәзкур лазирлиқ қорални хитай аләм бошлуқи пән-техника вә санаәт ширкитигә қарашлиқ бир кархана ясап чиққан. Хәвәрдә бу қоралниң бир секунт ичидә 200 метир йирақлиқтики нишанни йоқиталайдиғанлиқи, униң террорлуққа қарши туруш һәрикәтлиридә ишлитилидиғанлиқини билдүргән.

Хәвәрдә йәнә хитайниң «‹шәрқий түркистан ислам һәрикити' бөлгүнчилирини шинҗаңниң ичи вә сиртида нурғун зораванлиқ һуҗумларни елип барди,» дәп әйибләватқанлиқини тәкитлигән. Лекин кишилик һоқуқ тәшкилатлириниң билдүрүшичә, хитай һөкүмити уйғурларниң тинч, қанунлуқ тәләплирини «террорлуқ» қа бағлап, уларни учқучисиз айропилан қатарлиқ юқири техникилиқ һәрбий қораллар билән бастуруп кәлгән.

Америка дөләт ишлар министирлиқиниң бу йил 6‏-айда елан қилған хәлқара террорлуқ доклатида, хитайниң уйғур аптоном районидики террорлуққа қарши туруш һәрикитиниң нишани тинч өктичиләргә яки террорчиларға қаритилғанлиқиниң ениқ әмәслики қәйт қилинған иди.

«Иқтисад вақти» ториниң хәвиридә көрситишичә, мәзкур лазирлиқ қорал қариға елиш, тезгинәклик ток қачилаш, лазер нури қоюп бериш қатарлиқ бир қанчә парчидин тәшкил тапқан. Мәзкур қорални лайиһәләшкә қатнашқан инженирлардин йән аҗе «йәр шари вақит гезити» гә бәргән учурида бу қорални ишләткәндә униңдин аваз яки нур чиқмайдиғанлиқи, униң ишлитишкә әплик һәм тез икәнликини билдүргән. Лекин хәвәрдә бу қоралниң хитай аманлиқ күчлиригә қачандин башлап сәпләп берилидиғанлиқи тилға елинмиған.

Пикирләр (0)
Share
Толуқ бәт