مالايسىيا ھۆكۈمىتى بىر ئۇنىۋېرسىتېتنى ئۇيغۇرلار دىيارىدىكى زۇلۇمنى تەكشۈرۈشكە مەسئۇل قىلدى

مۇخبىرىمىز ئەزىز
2019-12-31
ئېلخەت
پىكىر
Share
پرىنت

 

خىتاي ھۆكۈمىتىنىڭ ئۇيغۇرلار دىيارىدىكى زۇلۇم ۋە باستۇرۇشلىرىغا قارىتا مالايسىيا مۇسۇلمانلىرى ئارىسىدا قاتتىق نارازىلىق پەيدا بولغاندىن كېيىن مالايسىيا ھۆكۈمىتى بۇ مەسىلىنى خىتاي تەرەپنىڭ دىققىتىگە سۇنغان ئىدى. خىتاي ھۆكۈمىتى دەرھاللا «چەتئەللەردىكى دۈشمەن كۈچلەرنىڭ قاراپ چاپلاش سۈيىقەستى» ھەققىدىكى بىر قاتار ماتېرىيالنى تەييارلاپ، مالايسىيا ھۆكۈمىتىنى ئالدىنىپ قالماسلىققا ئۈندىگەن. مالايسىيا تاشقى ئىشلار مىنىستىرى سەيفىدىن ئابدۇللا بۇ ھەقتە سۆز قىلىپ «مالايسىيا بۇ مەسىلىدە خىتاي ھۆكۈمىتىنىڭ دوكلاتلىرىغا قارا قويۇق ئىشەنمەيدۇ، شۇنداقلا ئۇنى ئوچۇق ئاشكارىمۇ تەنقىد قىلمايدۇ» دېگەن ئىدى.


30-دېكابىر كۈنى مالايسىيا ھۆكۈمىتى پايتەخت كۇئالا لۇمپۇردىكى «ئىسلامىي تەپەككۈر ۋە مەدەنىيەت خەلقئارا ئىنىستىتۇتى» نى ئۇيغۇرلار دىيارىدىكى زۇلۇمغا دائىر مەسىلىلەر ھەققىدە ئوتتۇرىغا چىققان مەلۇماتلارنى دەلىللەشكە مەسئۇل قىلىپ بېكىتتى. مالايسىيادىكى «بوغۇز ۋاقتى» گېزىتىنىڭ بۇ ھەقتە بېرىلگەن خەۋىرىدە ئېيتىلىشىچە، مالايسىيا ھۆكۈمىتى مۇشۇ ئارقىلىق «شىنجاڭدا ئۇيغۇرلارنىڭ تېرورلۇق ھەركىتى بار ياكى يوقلۇقىنى، بۇ جايدا تېرورلۇقنىڭ زادى قايسى دەرىجىدە ئىكەنلىكىنى تەكشۈرۈش» نى ئۈمىد قىلماقتىكەن. 

كۇئالا لۇمپۇردىكى ئۇيغۇرلارنى قوللىغۇچى مۇسۇلمانلار ئۆتكەن ھەپتە خىتاي ئەلچىخانىسى ئالدىغا توپلىنىپ: «ئۇيغۇرلارغا قارىتىلغان قىرغىنچىلىقنى توختىسۇن!» دەپ شوئار توۋلىغان ئىدى. خىتاينىڭ مالايسىيادىكى باش ئەلچىسى بەي تيەن بولسا بۇ ھەقتە چۈشەنچە بېرىپ: «بىز بۇ خىلدىكى ئاساسسىز تۆھمەتنى قوبۇل قىلالمايمىز» دېگەن. ئۇنىڭ بۇ سۆزى مالايسىيا باش مىنىستىرى مۇھەممەد ماخاتىر: «بىز مالايسىياغا قېچىپ كەلگەن ھەرقانداق ئۇيغۇرنى خىتايغا قايتۇرۇپ بەرمەيمىز. خىتاي ھۆكۈمىتى تەلەپ قىلسىمۇ ئۆتكۈزۈپ بەرمەيمىز» دەپ بايانات ئېلان قىلغاننىڭ ئەتىسىگە توغرا كەلگەن.

 

پىكىرلەر (0)
Share
تولۇق بەت