Елшат һәсән: «уйғурларниң дуч келиватқини мәдәнийәт қирғинчилиқиниң нәқ өзи!»

Мухбиримиз әзиз
2019-07-31
Елхәт
Пикир
Share
Принт

Хитай һөкүмитиниң уйғур дияридики зор көләмлик бастуруш вә тутқун һәрикити хәлқараниң күчлүк тәнқидигә дуч кәлгәндин кейин америка башчилиқидики ғәрб дөләтлири хитай һөкүмитини қаттиқ әйиблигән иди. Хитай һөкүмити буниңға қарита инкас сүпитидә 19-июл күни «йәр шари вақти гезити» дә бир түркүм уйғур зиялийлири вә диний затлириниң америка ташқи ишлар министири майк помпейоға язған коллектип мәктупини елан қилип, бу уйғур сәрхиллириниң «америка башчилиқидики ғәрб күчлириниң әйибләшләргә қаттиқ ғәзәпләнгәнлики» ни билдүрди.

Америка уйғур бирләшмисиниң рәиси елшат һәсән 30-июл күни малайсиядики инглиз тилида нәшр қилинидиған әң чоң гезитләрниң бири болған «бүгүнки малайсия» гезитидә мақалә елан қилип, өзиниң хитай һөкүмити елан қилған бу мәктупни рәт қилидиғанлиқини билдүрди. Шундақла хитай һөкүмитиниң уйғурларға селиватқан зулумлирини «һәқиқәтәнму мушу әсирниң йүзигә чүшкән дағ дейиш мумкин,» деди.

Елшат һәсән өз мәктупида хитай һөкүмитиниң «11-сентәбир вәқәси» дин тартип изчил «террорлуққа қарши туруш» намида уйғурларни бастуруштәк суйиистемалчилиқ қилмишини давам қиливатқанлиқини тәкитләп, «бу җайда ислам дини мәвҗут, әмма һечқандақ әсәбийлик яки террорлуқ һадисилири мәвҗут болған әмәс,» дәп көрсәтти. Шундақла америка террорлуққа қарши туруш саһәсидики һәммигә мәлумлуқ затлардин нейсин сейлисниңму аталмиш «тәрбийәләш мәркәзлириниң террорлуқ яки әсәбийлик билән һечқандақ алақиси йоқ» дәп көрсәткәнликини буниңға қошумчә қилди.

У өз мақалисидә пүткүл уйғурлар дияриниң «үсти очуқ түрмә» гә айлинип болғанлиқини, хитай һөкүмитиниң ашкара һалда уйғурларниң «нәсәбини үзүп ташлаш, йилтизини кесип ташлаш, алақисини үзүп ташлаш, мәнбәсини кесип ташлаш» һәққидә җар селиватқанлиқини, буниң һазир сиясий, иқтисад, мәдәнийәт, дин вә аилә мунасивәтлиридә көпләп ашкара иҗра болуватқанлиқини әскәртти. У йәнә лагердики тутқунларниң барчә инсаний иззәттин мәһрум һалда нәдиликиму намәлум һалда динға қарши туруш, компартийәни илаһлаштурушқа мәҗбурлиниватқанлиқи, уйғур зиялийлириниң йүзләп-миңлап тутқун қилиниши, уйғур диний затлириниң «диний хитайчилаштуруш» ниң қурбаниға айлиниватқанлиқи, уйғур өсмүрлириниң ата-анилиридин җуда һалда «меңә ююш» ниң обйекти қилиниши қатарлиқларниң өзила уйғурларниң зор көләмлик бир мәйдан «мәдәнийәт қирғинчилиқи» ға дуч келиватқанлиқини хуласә тәриқисидә оттуриға қойди.

Елшат һәсән ахирида шаһитларниң баянлири, җүмлидин һайванларчә қийнашниң миңлиған усуллириға лиқ толған лагерлар һәққидики биваситә вә васитилик маддий испатларни қисқичә баян қилип, хитай һөкүмитиниң өтмүштикигә охшаш йәнә бир қетим алдамчилиқ қилип хәлқараниң көзини бойимақчи болуватқанлиқини билдүрди.

Пикирләр (0)
Share
Толуқ бәт