Уйғур елиниң шәһәр районлиридики мәһәллә комитетлири олтурақ аһалиләрни контрол қилиштики асаслиқ орунға айланған

Мухбиримиз қутлан
2017-10-28
Елхәт
Пикир
Share
Принт

Илгири уйғур елидики чоң шәһәрләрдә болсун яки наһийә дәриҗилик шәһәрләрдә болсун, мәһәллә комитетиниң хизмәт даириси пәқәтла өз тәвәликидики олтурақ аһалиләрниң һөкүмәт билән болған мунасивәтләрдики рәсмийәтләрни беҗириш вә башқа мәһәлливи мәмурий ишлар билән чәкләнгәнлики мәлум.

Һалбуки, йеқинқи бирқанчә йилдин буян хитай һөкүмити уйғур елиниң шәһәр районлиридики мәһәллә комитетиниң хизмәт даириси билән һоқуқ күчини барғансери кеңәйткән.

Чен чүәнго уйғур диярини контрол қилған бир йилдин буян, шәһәр районлиридики мәһәлләр комитетлири өз тәвәликидики олтурақ аһалиләрни башқуруш, контрол қилиш, уларниң күндилик һаятини көзитиш, һәр бир шәхс вә аилиниң архипини турғузуш шуниңдәк уларниң сиясий җәһәттин ишәнчлик яки гуманлиқлиқини бекитиштә һәл қилғуч рол ойнайдиған асасий қатлам һөкүмәт оргиниға айланған.

Әһвалдин хәвәрдар кишиләрниң йеқинда радийомизға инкас қилишичә, шәһәр районлиридики мәһәллә комитетлири өз тәвәликидики сақчиханилар билән бир гәвдиләшкән һалда иш елип баридикән. Олтурақ аһалиләрниң паспортқа илтимас қилиши, чәтәлгә чиқип туғқан йоқлиши яки саяһәткә бериши, өй иҗаригә елиши яки иҗаригә бериши, өй сетивелиши яки сетиши қатарлиқ ишларниң биринчи қәдими алди билән мәһәллә комитетлириниң тәстиқини елиштин башлинидикән. Мәһәллә комитетиниң тәстиқи, тамғиси яки мәсул кишиниң имзаси болмай туруп, һәрқандақ бир илтимас юқири дәриҗилик органларға әвәтилмәйдикән.

Тәңритағ ториниң бүгүнки хәвиригә қариғанда, үрүмчиниң тәңритағ райониға қарашлиқ һәрқайси мәһәллә комитетлири өз тәвәликидики олтурақ аһалиларға 19-қурултайниң роһини йәткүзүш тәшвиқатини башлиған. 

Көзәткүчиләр, уйғур елидики мәһәлләр комитетлириниң буниңдин кейин техиму көп сиясий тәшвиқат вәзипилирини өз үстигә алидиғанлиқини, олтурақ аһалиләрниң шәхсий һаятини контрол қилишта әң үнүмлүк йәрлик органға айлинидиғанлиқини тәхмин қилмақта.

Пикирләр (0)
Share
Толуқ бәт