Uyghur élining sheher rayonliridiki mehelle komitétliri olturaq ahalilerni kontrol qilishtiki asasliq orun'gha aylan'ghan

Muxbirimiz qutlan
2017-10-28
Élxet
Pikir
Share
Print

Ilgiri Uyghur élidiki chong sheherlerde bolsun yaki nahiye derijilik sheherlerde bolsun, mehelle komitétining xizmet da'irisi peqetla öz tewelikidiki olturaq ahalilerning hökümet bilen bolghan munasiwetlerdiki resmiyetlerni béjirish we bashqa mehelliwi memuriy ishlar bilen cheklen'genliki melum.

Halbuki, yéqinqi birqanche yildin buyan xitay hökümiti Uyghur élining sheher rayonliridiki mehelle komitétining xizmet da'irisi bilen hoquq küchini barghanséri kéngeytken.

Chén chüen'go Uyghur diyarini kontrol qilghan bir yildin buyan, sheher rayonliridiki meheller komitétliri öz tewelikidiki olturaq ahalilerni bashqurush, kontrol qilish, ularning kündilik hayatini közitish, her bir shexs we a'ilining arxipini turghuzush shuningdek ularning siyasiy jehettin ishenchlik yaki gumanliqliqini békitishte hel qilghuch rol oynaydighan asasiy qatlam hökümet orginigha aylan'ghan.

Ehwaldin xewerdar kishilerning yéqinda radiyomizgha inkas qilishiche, sheher rayonliridiki mehelle komitétliri öz tewelikidiki saqchixanilar bilen bir gewdileshken halda ish élip baridiken. Olturaq ahalilerning pasportqa iltimas qilishi, chet'elge chiqip tughqan yoqlishi yaki sayahetke bérishi, öy ijarige élishi yaki ijarige bérishi, öy sétiwélishi yaki sétishi qatarliq ishlarning birinchi qedimi aldi bilen mehelle komitétlirining testiqini élishtin bashlinidiken. Mehelle komitétining testiqi, tamghisi yaki mes'ul kishining imzasi bolmay turup, herqandaq bir iltimas yuqiri derijilik organlargha ewetilmeydiken.

Tengritagh torining bügünki xewirige qarighanda, ürümchining tengritagh rayonigha qarashliq herqaysi mehelle komitétliri öz tewelikidiki olturaq ahalilargha 19-qurultayning rohini yetküzüsh teshwiqatini bashlighan. 

Közetküchiler, Uyghur élidiki meheller komitétlirining buningdin kéyin téximu köp siyasiy teshwiqat wezipilirini öz üstige alidighanliqini, olturaq ahalilerning shexsiy hayatini kontrol qilishta eng ünümlük yerlik organ'gha aylinidighanliqini texmin qilmaqta.

Toluq bet