Японийәлик картонистниң меһригүл турсун һәққидики картон романи зор қизиқишқа еришкән

Мухбиримиз әркин
2019-12-16
Елхәт
Пикир
Share
Принт

Японийәлик язғучи вә картонист томоми шимизуниң сабиқ уйғур лагер тутқуни меһригүл турсун һәққидики картон романи зор қизиқиш қозғиған.

«Вашингтон почтиси» гезитиниң хәвәр қилишичә, картон романи һазирға қәдәр 240 миң қетим көрүлгән, шундақла тветтир қатарлиқ иҗтимаий таратқуларда 2 милйон 600 миң яхши көрүшкә еришкән. Томони шизуминиң «маңа немә болди: бир уйғур аялниң гуваһлиқи» намлиқ картон романи меһригүл турсунниң түрмә вә лагердики кәчмишигә даир баянлирини асас қилип, униң мисирға той қилип, 3 қош кезәк туғуши, вәтәнгә қайтип тутқун қилиниши, лагер вә түрмидә тән җазасиға учуруши, 3 кезәк балисиниң бириниң өлүп кетиши, шундақла йолдишиниң 16 йиллиқ қамаққа һөкүм қилиниши қатарлиқ трагедийәлик кәчмишини тема қилиду. Һазир икки пәрзәнти билән америкида яшаватқан меһригүл турсун хитайниң йиғивелиш лагерлиридин һаят қутулуп чиққан санақлиқ тутқунларниң бири болуп, униң трагедийәлик кәчмиши хәлқарада қаттиқ ғулғула қозғиғаниди.

Томоми шимизуниң «вашингтон почтиси» гезитигә билдүрүшичә, у меһригүл турсун билән биваситә алақилишип бақмиған болсиму, әмма у мәзкур картон романини йезишта уйғурларниң бастурушқа учраватқанлиқи вә меһригүл турсунниң кәчмишини аңлап шуниңдин илһам алған. Шимизу «вашингтон почитиси» ниң мухбириға қилған сөзлиридә йәнә «мән немә иш қилип берәләймән?, дәп ойлидим. . . . . . Мән картон сизишни 20 йилниң алдида башлиған. Шуниң билән картон сизай, дегән ойға кәлдим» дегән. Лекин, томоми шизуминиң билдүрүшичә, бу униң уйғурлар һәққидә сизған тунҗи картони әмәс икән. У, хитайниң уйғурларни бастуруватқанлиқини тунҗи қетим бир телевизийә қанилиниң һөҗҗәтлик филимидә көргән. Шуниң билән у бу йил 5‏-айда өзиниң «һечким у дөләтниң исмини ейтип берәлмәйду» мавзулуқ уйғурлар һәққидики тунҗи картон сүрәтлик романини сизип чиққан. Униң билдүрүшичә, бу картон униң японийәдики уйғурларға қизиқиш қозғиған болуп, у меһригүл турсунниң вәқәсини хәлқара кәчүрүм тәшкилати билән японийә мейҗи университетиниң бирлишип өткүзгән бир паалийитидә аңлиған икән.

Пикирләр (0)
Share
Толуқ бәт