Америка муавин президенти майк пәнсниң сөзи хитайни қаттиқ биарам қилди

Мухбиримиз әркин
2019-10-26
Елхәт
Пикир
Share
Принт

Американиң муавин президенти майк пәнсниң 24‏-өктәбир вашингтондики әқил амбири ‏- вилсон мәркизидә сөзлигән американиң хитай сиясити һәққидики нутқи хитай һөкүмитини қаттиқ биарам қилған. Хитай ташқи ишлар министирлиқи 25‏-өктәбир майк пәнсниң сөзигә инкас қайтуруп, униң сөзлирини «тәкәббурлуқ», «икки йүзлимичилик» билән әйиблигән.

Майк пәнс пәйшәнбә күни вилсон мәркизидә сөзлигән нутқида, хитайниң қәрз дипломатийәси, һәрбий кеңәймичилик, диний әркинликни бастуруш, назарәт дөлити бәрпа қилиш сиясити йүргүзүп, , әркин сода вә адил риқабәт принсиплириға хилаплиқ қилип келиватқанлиқи, американиң мәнпәәти вә қиммәт өлчимигә бузғунчилиқи қиливатқанлиқини тәкитлигән. 

У нутқида йәнә уйғурларни тилға елип, «хитайдики милйонлиған етник милләтләр вә диний аз санлиқ гуруппилар (коммунистик )партийәниң диний етиқади вә мәдәнийитини йоқитиш урунушиға қарши тиркәлмәктә. Хитай компартийәси християн поплирини тутқун қилип, инҗил сетишни чәклиди. Черкав вә мәсчитләрни чеқип, бир милйондин артуқ мусулман уйғурни қамиди. Биз бейҗиңни униң шинҗаңдики аз санлиқ мусулман хәлқләргә тутқан муамилисини җавабкарлиққа тарттуқ. Президент трамп техи өткән айдила хитай компартийәси әмәлдарлириға виза чәклимиси қоюп, уйғур вә башқа мусулман аз санлиқ милләтләрни бастурған вә униңға һәмкарлашқан 20 хитай җ х идариси вә 8 хитай ширкитигә имбарго йүргүздуқ» дегәниди. 

Франсийә агентлиқиниң хәвәр қилишичә, хитай ташқи ишлар министирлиқи баянатчиси хуа чүнйиң җүмә күни американиң «мәсулийәтсиз пикирдә болушни тохтитиши» ни тәләп қилған. У, американиң «пүтүн әхлақ изналирини вә ишәнчиликлиги» ни йоқатқанлиқини, вашингтонниң «икки дөләт мунасивити вә өз ара ишәнчкә зиян селишни тохтитиши» ни тәләп қилидиғанлиқини билдүргән. 

Бу, майк пәнсниң йеқинқи бир йил ичидә 2‏-қетим нутуқ сөзләп, американиң хитай сияситини шәрһилиши вә һәр икки қетимда уйғурларни алаһидә тилға елишидур.

Пикирләр (0)
Share
Толуқ бәт