Misirning armiye hamiyliqidiki yéngi hökümiti musulman qérindashlar teshkilatini yenimu ilgiriligen halda basturidighanliqini bildürgen

Muxbirimiz qutlan
2013-12-27
Élxet
Pikir
Share
Print

"Nyo-york waqit géziti" ning bügünki xewirige qarighanda, misirning armiye terep yölep turghuzghan yéngi hökümiti charshenbe küni musulman qérindashlar teshkilatini "Térrorchi teshkilat" dep élan qilghan.

Melum bolushiche, bu qarar élan qilinip, aridin bir kün ötmeyla misir armiye terep yéngi hökümet bilen birliship musulman qérindashlar teshkilatining gholluq ezalirini keng kölemde tutqun qilishqa bashlighan. Peyshenbe künigiche pütün memliket miqyasida nechche onlighan kishilerning qolgha élin'ghanliqi melum.

Misirning démokratik saylam bilen textke chiqqan tunji re'isi muhemmed mursi armiye terepning arilishishi bilen mejburiy ghulitilghandin kéyin misir yene bir meydan qalaymiqanchiliq patqiqigha pétip qalghan. Armiye terep yölep turghuzghan yéngi hökümet muhemmed mursi bashchiliqidiki musulman qérindashlar teshkilatini üzül-késil tazilashni qarar qilghan.

Xewerlerge qarighanda, misirdiki musulman qérindashlar teshkilati bilen alaqisi bar dep guman qilin'ghan bir qisim ijtima'iy we xeyr-éhsan teshkilatlirimu mejburiy tarqitilip, mebleghliri tonglitilishqa bashlighan.

Toluq bet