Xitay hökümiti misirdiki xitay puqralirini "Uqushmasliq" tin hézi bolushqa chaqirdi

Muxbirimiz irade
2017-07-13
Élxet
Pikir
Share
Print

Misirdiki Uyghurlarning tutqun qiliniwatqanliqi heqqidiki xewerler toxtimay ashkariliniwatqan bir mezgilde, misirdiki xitay elchixanisi öz tor bétide uqturush chiqirip, misirdiki xitay puqralirigha bixeterlik tedbirlirini kücheytish heqqide yene bir qétim chaqiriq qilghan.

Uqturushta mundaq déyilgen: "Misirdiki xitay puqraliri choqum weziyetni yaxshi közitishi, misirning bixeterlik tekshürüshlirige hörmet qilip, uninggha yaxshi masliship, yénida choqum kimlik matériyallirini toluq élip yürüshi kérek. Uqushmasliq yüz bérip, jiddiy ehwal kélip chiqishining aldini élishi, amal bar diniy pa'aliyet sorunlirigha, adem jiq, sezgür orunlargha barmasliqi kérek."

Tünügün xitayning misir elchixanisi öz tor bétide, misirdiki Uyghurlarning tutqun qilinish weqesige qarita tunji qétim izahat xaraktérlik bir uchurni élan qilghan idi. Shinxu'a agéntliqi muxbirining so'ali we uninggha elchixanining jawabi sheklide bérilgen uchurda, shinxu'a muxbiri elchixanidin yéqinda misirdiki bir türküm xitay puqralirining, jümlidin Uyghurlarning tutqun qilin'ghanliqigha qarita köz qarishini sorighan. Elchixana xadimi tutqunning sewebini misir weziyitige baghlap chüshendürüp, diqqet qilishimizche, yéqindin buyan misirdiki alaqidar organlar, misirda turuwatqan chet'elliklerni bashqurushni kücheytti we bir qisim chet'elliklerni tutti, buning ichide junggoluqlarmu bar iken, dep jawab qayturghan.

Halbuki, chet'ellerdiki Uyghur közetküchiler xitay elchixanisi bu bayanat arqiliq misirdiki tutqun qilin'ghan Uyghurlar qanunluq turush ruxsiti bolmighanliqtin tutqun qilindi, dégen bir chüshenchini peyda qilmaqchi bolghan, dep qarimaqta. Derweqe, yéqindin buyan élan qiliniwatqan xelq'ara xewerlerde, xitay hökümiti birqanche ay awwal chet'ellerde oquwatqan Uyghur oqughuchilargha yurtigha qaytish heqqide buyruq chüshürgenliki, ularning a'ile-tawabi'atlirini görüge alghanliqi, doktor hebibulla toxti qatarliq ezher uniwérsitétini püttürüp yurtigha qaytqan Uyghurlarning türmige élin'ghanliqi melum bolghan idi.

Toluq bet