Чен чүәнго «бир бәлвағ, бир йол» йиғини мәзгилидики муқимлиқ тәдбирлирини күчәйтишни тәләп қилди

Мухбиримиз үмидвар
2017-05-07
Елхәт
Пикир
Share
Принт


14-15-Май күнлири бейҗиңда ечилидиған хәлқаралиқ «бир бәлвағ, бир йол» алий рәһбәрлири учришиши йиғини җәрянидики муқимлиқ вә аманлиқ тәдбирлирини күчәйтиш үчүн уйғур аптоном райони парткоми 5-май күни мәхсус телевизийә йиғини чақирип, бир қатар орунлаштурушларни елип барған.

«Тәңритағ» ториниң учуридин ашкарилинишичә, 5-май күни үрүмчидә чақирилған мәзкур муқимлиқни капаләткә игә қилиш телевизийә йиғинида партком секретари чен чүәнго сөз қилип, йеқинда ечилидиған«бир бәлвағ, бир йол» хәлқаралиқ һәмкарлиқ йиғини җәрянидики уйғур райониниң муқимлиқни қоғдашни күчәйтишни, һушярлиқни юқири дәриҗидә өстүрүшни тәләп қилған.

Бу қетимқи телевизийә йиғинида асаслиқи мәзкур йиғин җәрянидики уйғур райони даирисидики бихәтәрлик вә муқимлиқини қаттиқ қоғдаш тәдбирлирини бекитиш һәм орунлаштуруш тәкитләнгәнлики мәлум.

Хитайниң тунҗи қетимлиқ «бир бәлвағ, бир йол» хәлқара алий рәһбәрләр йиғини 14-15-май күнлири бейҗиңда чақирилидиған болуп, хитай тәрәп бу йиғинға 28 дөләт алий рәһбәрлири иштирак қилидиғанлиқини җакарлиған. Әмма, учур васитилиридин мәлум болушичә, ши җинпиңниң саһибханилиқида ечилидиған мәзкур хәлқаралиқ алий рәһбәрләр йиғиниға қатнишидиған мәмликәтләр асаслиқи асиядики дөләтләр болуп, ғәрб дөләтлири рәһбәрлири қатнашмайдикән.

Пикирләр (0)
Share
Толуқ бәт