Президент обама мусулман мусапирларни америкиға қобул қилмаслиқ пикрини тәнқид қилди

Мухбиримиз әркин
2015-11-18
Елхәт
Пикир
Share
Принт

Президент обама мусулман мусапирлирини америкиға қобул қилмаслиқ пикрини тәнқидләп, мусапирларға диний өлчәм қоюшниң америка қиммәт қаришиға хилап икәнликини агаһландурди.

Парижда йүз бәргән террорлуқ һуҗуми америкида сүрийәлик мусапирларни қобул қилиш-қилмаслиқ һәққидә муназирә қозғиған.

Фирансийә һөкүмити 132 адәм өлгән париждики террорлуқ һуҗумда бәзи террорчиларниң сүрийә мусапирлириға қошулуп явропаға киргәнликини байқиған. Бу әһвал ғәрб әллириниң һошярлиқини қозғиған иди.

Америкида президентлиққа намзат бәзи җумһурийәтчиләр мусулман мусапирларни қобул қилиш бихәтәрликкә тәһдит кәлтүридиғанлиқини әскәртип, пәқәт сүрийәлик христиан мусапирларнила қобул қилишни оттуриға қойған.

Кеңәш палата әзаси, җумһурийәтчиләр президент намзати тәд круз шу пикирдики сиясәтчиләрниң бири болуп, у мусулман мусапирларни оттура шәрқ вә башқа мусулман әлләргә орунлаштурушни оттуриға қойған.

Бирақ, президент обама бу пикирни «номус қиларлиқ» дәп көрсәтти. У, бу сөзни түркийәниң анталийә шәһиридә өткүзгән ахбарат йиғинида қилди. Обама сөзидә, бу пикирни оттуриға қойған бәзи кишиләрниң өзи, сиясий зиянкәшликтин қечип келип қоғдашқа еришкән аилиләрдин келип чиққанлиқини тәкитлиди. Обама һөкүмити бу йил 9‏-айда сүрийәлик мусапирларни қобул қилишни көпәйтидиғанлиқини билдүргән.

Пикирләр (0)
Share
Толуқ бәт