Ниңшя даирилириниң уйғур ели билән «террорлуққа қарши һәмкарлиқ келишими» имзалиши күчлүк диққәт қозғиди

Мухбиримиз ирадә
2018-11-29
Елхәт
Пикир
Share
Принт

Хитайниң һөкүмәт авази болған «йәршари вақти гезити» дә елан қилинған «ниңшия террорлуққа қарши күрәш қилишни шинҗаңдин өгиниватиду» мавзулуқ хәвәр мақалиси күчлүк диққәт қозғиди.

27-Ноябир күни елан қилинған мәзкур хәвәрдә ейтилишичә, ниңшия туңган аптоном районлуқ парткомниң секретари җаң йүншең йеқинда уйғур елини зиярәт қилип, районниң террорлуққа қарши туруп, муқимлиқни қоғдаш тәҗрибилирини өгәнгән вә тәкшүрүштә болған. Зиярәт ахирида ниңшия билән уйғур ели арисида «террорлуққа қарши туруш һәмкарлиқ келишими» мақулланған.

Юқириқи бу хәвәр тивиттер торида күчлүк инкас қозғиди. Хитайниң вәзийитини көзитип келиватқан нурғун көзәткүчиләр юқириқи бу хәвәрни ниңшядики мусулман аһалисиниңму уйғурларға охшаш ақивәтләргә дучар болидиғанлиқиниң бешарити дәп қарашти.

Хитай һөкүмити «террорлуқ» вә «радикаллиқ» қа қарши туруш нами билән бир милйондин ошуқ уйғурни лагерға солиғандин кейин, мусулман аһалә көп санлиқни тәшкил қилидиған ниңшия вә гәнсу қатарлиқ җайлардиму «диний әсәбийлик» вә «бөлгүнчилик» кә қарши туруш намида ислам динини қаттиқ қоллуқ билән контрол қиливатқанлиқи, туңган аһалилириниң дини әркинликиниңму илгирикидин көп һалда чекингәнлики мәлум болған иди.

«Ташқи сиясәт» журнилида елан қилинған бир хәвәрдә ейтилишичә, хитайда әң кәң қоллинилидиған «үндидар» әпиниң супилири мусулманлар вә исламға қарши тәшвиқатлар билән тошуп кәткән болуп, адәттә учур қамал қилишта әң илғар сәвийәгә игә болған хитай һөкүмитиниң бу учурларни көрмәскә селиши диққәт қозғайдикән.

Пикирләр (0)
Share
Толуқ бәт