Amérika dölet mejlisi ezaliri xongkongluq démokratiye pa'aliyetchilirini nobél tinchliq mukapatigha namzatliqqa körsetti

Muxbirimiz irade
2018-02-01
Élxet
Pikir
Share
Print

Amérika dölet mejlisining ezaliri xongkongluq démokratiye pa'aliyetchiliridin jashu'a wang, natan lo, aléks chu we ular teshkilligen "Künlük herikiti" ni 2018 yilliq nobél tinchliq mukapatigha namzat qilip körsetti.

Firansiye agéntliqining xewer qilishiche, amérikining töt neper kéngesh palata ezasi we 8 neper awam palata ezasi peyshenbe küni mezkur qararini jakarlighan. Ular norwégiyediki nobél komitétigha yollighan mektubida yuqiridiki yashlarning we "Künlük herikiti" ning tinchliq usuli arqiliq xongkong démokratiyisini qoghdap qélish üchün körsetken tirishchanliqini mu'eyyenleshtürgen hemde ularning yenimu köp erkinlik pa'aliyetchilirige ilham bolushi kéreklikini bildürgen. Ular, "Yuqiriqi bu yashlar tehdit, parakende qilish, qolgha élish, qanuniy jazagha tartilish qatarliq tehditlerge qarshi jasaritini namayan qildi," dep yazghan. 

2014-Yili jashu'a wang qatarliqlar teripidin teshkillen'gen "Künlük herikiti" xongkongdiki on minglighan aliy mektep oqughuchisining qollishigha érishken we heptilerche dawam qilghan idi. Oqughuchilar xongkongdiki merkizi tijaret meydanida sükütte olturush arqiliq xongkongda xitay hökümitining tesirining küchiyishige qarshiliq bildürgen. Biraq xitay hökümiti bu heriketni xongkong saqchi küchlirini ishqa sélish arqiliq basturuwetken. Namayish teshkilligüchilerni köp qétim "Qalaymiqanchiliq chiqirish, tertip buzush" dégendek sewebler eyibligen. Jashu'a wangni 3 ayliq qamaq jazasigha höküm qilghan idi. 

Melum bolushiche, xongkongdiki démokratiye pa'aliyetchilirini namzatliqqa körsetken amérika dölet mejlisining ezaliri ichide jumhuriyetchi eza marko rubiyo, démokratchi eza geriy pétérs qatarliq zor tesirge ige kishilermu bar iken. 

Xitay hökümiti teripidin ömürlük qamaq jazasigha höküm qilin'ghan Uyghur ziyaliysi ilham toxtimu yawropa parlaméntining mu'awin re'isi fabi'o kastaldo, parlamént ezasi ilxan küchük, hélga trüpél, lazlo tokes, ignazi'o korra'o qatarliqlar teripidin nobél tinchliq mukapatigha namzat körsitilgen idi.

Toluq bet