Алтә йиллиқ дипломатик соғуқчилиқтин кейин хитай билән норвегийәниң мунасивити әслигә кәлгән

Мухбиримиз қутлан
2016-12-19
Елхәт
Пикир
Share
Принт

Түрмидики хитай өктичиси лю шавбоға нобел тинчлиқ мукапати берилиши сәвәблик 6 йилдин буян дипломатик соғуқчилиққа петип қалған хитай-норвегийә мунасивитиниң нөвәттә нормаллашқанлиқи мәлум.

Бирләшмә агентлиқниң бу һәқтики хәвиригә қариғанда, норвегийә ташқи ишлар министири борге бренди бүгүн, йәни 19-декабир күни туюқсизла бейҗиңни зиярәт қилип, икки дөләт мунасивитиниң әслигә кәлгәнлики һәққидә бирләшмә баянат елан қилған.

Бирләшмә баянатта мундақ дейилгән: «норвегийә һөкүмити ‹бир җуңго принсипи' ға, җуңгониң игилик һоқуқи вә земин пүтүнлүкигә толуқ һөрмәт қилиду. Җуңгониң дөләт мәнпәитигә зиянлиқ вә икки тәрәпниң мунасивитигә тәсир йәткүзидиған һәрқандақ сөз-һәрикәтләрдин өзини йирақ тутиду.»

Әпсуслинарлиқи шуки, бирләшмә баянатта кишилик һоқуқ мәсилисигә четилидиған һечқандақ сөз-ибарә тилға елинмиған.

Игилинишичә, хитай өктичи лю шавбоға нобел тинчлиқ мукапати берилгәндин кейин, хитай тәрәп норвегийәгә қаттиқ бесим ишләткән. Норвегийә таратқулириниң ашкарилишичә, хитай көп қетим норвегийә һөкүмитиниң өзлиридин рәсмий кәчүрүм соришини тәләп қилған. Әмма норвегийә һөкүмити буни рәт қилип, нобел комитетиниң бир мустәқил тәшкилат икәнликини, униң қарариниң норвегийә һөкүмәт тәрәп билән мунасивити йоқлуқини тәкитлигән.

Норвегийә баш министири ерна солберг бу мунасивәт билән инкас қайтуруп: «норвегийә билән җуңго оттурисидики 6 йилға созулған дипломатик тоңда норвегийә иқтисади шәк-шүбһисизки зәрбигә учриди,» дегән.

Пикирләр (0)
Share
Толуқ бәт