Prézidént obama amérikiliqlarni özlirining köchmenlik tarixini untush bilen eyiblidi

Muxbirimiz erkin
2015-12-15
Élxet
Pikir
Share
Print


Seyshenbe küni yéngidin amérika puqraliqigha ötken bir türküm kishilerni tebrikligen prézidént obama amérikiliqlarni özlirining köchmenlik tarixini untush bilen eyiblidi we bu nöwetlik jumhuriyetchi prézidént namzatlirining musulmanlarning amérikigha kélishini tosush chaqiriqini wasitilik tenqidlidi.

U mundaq dédi: "Bir süriyelik musapirni körginimizde, 2 - dunya urushidin qachqan yehudiy köz aldimizgha kélishi kérek. Biz bularni qandaqsige shunche tiz untuduq. Bir ewladning ötishi, ikki ewladning ötishi bilen biz qeyerdin kelgenlikimizni untup, 'biz' we 'ular' déyiship, özimizning bir zamanlarda ashu ' ular' ning ornida ikenlikimizni esliyelmeydighan bolup qalduq."

U yene köchmenlerning amérikining hayati küchini ulghaytip kelgenlikini alahide tekitlidi.

Uning bu sözliri bir qisim prézidéntliq kandidatlirining musulman köchmenlirini amérikigha kélishtin cheklesh pikri ötken bir nechche kündin buyan amérika axbaratida küchlük munazire qozghighan mezgilge toghra keldi.

Jumhuriyetchiler partiyesidin bolghan bu nöwetlik prézidéntliq namzati donald tramp ötken hepte barliq musulmanlarning amérikigha kérishini cheklesh kéreklikini bildürgen.

Uning bu sözliri, dölet mejlisi ezaliridin tartip, bashqa prézidént namzatlirighiche bolghan bir qatar yuqiri derijilik siyasiyonlarning eyiblishige uchrighan idi.

Obama seyshenbe künidiki nutqida amérikining musteqilliq xitabnamisige imza qoyghuchilarningmu köchmenler ikenlikini tilgha aldi we mundaq dédi: "Amérika qoshma shtatliri a'ile 'injil' liri, 'torah' yaki 'qur'an' lirini kötürüp kelgen köchmenler dolqunini top - top qobul qilipla qalghan dölet emes, belki köchmenlik bizning hékayimizning bashlinishi, ikki esirdin köprek waqit ötken bolsimu, bu nuqta dölet xaraktérimizning eng négizide turup kelmekte."

Toluq bet