Хитайниң оттавадики әлчиханиси уйғур паалийәтчини һақарәтлигән, хитай оқуғучиниң қилмишини «вәтәнпәрвәрлик» дегән

Мухбиримиз әркин
2019-02-20
Елхәт
Пикир
Share
Принт

Хитайниң оттавада турушлуқ әлчиханиси канаданиң мәкмастер университетида өткүзүлгән йиғинида уйғур паалийәтчи руқийә турдушни һақарәтлигән хитай оқуғучиниң қилмишини «вәтәнпәрвәрлик» дәп махтиған.

11‏-Феврал күни мәкмастер университетидики мусулман оқуғучилар уюшмиси канададики уйғур паалийәтчи руқийә турдушни уйғурларниң кишилик һоқуқ вәзийити вә лагерлар һәққидә доклат беришкә тәклип қилған. Йиғинда бир хитай оқуғучи кашила чиқирип, руқийә турдушни һақарәтлигән. Бу вәқә хәлқара таратқуларда ғулғула қозғап, бу оқуғучиниң арқисида торонтодики хитай консулханисиниң барлиқи илгири сүргән. Бу оқуғучиниң қилмиши йәнә «канада хитай оқуғучилар вә илмий хадимлар җәмийити» намлиқ органниң қоллишиға еришкән.

«Җәнубий хитай әтигәнлик почтиси» гезитиниң хәвәр қилишичә, хитайниң оттавадики әлчиханиси йеқинда баянат елан қилип, бу оқуғучиниң һәрикитини қоллайдиғанлиқини билдүргән. Баянатта «биз җуңго оқуғучилириниң бу һәққаний вә вәтәнпәрвәрлик һәрикитини қоллаймиз. Игилик һоқуққа капаләтлик қилип, бөлгүнчиликкә қарши туруш хәлқара җамаәтниң ортақ мәйдани. Шуниңдәк бу канада һөкүмитиниңму мәйдани» дегән.

Хитай әлчиханиси бу хитай оқуғучиниң һәрикитини қоллиған болсиму, лекин бу вәқәниң арқисида хитай дипломатик органлириниң барлиқини рәт қилған. Баянатта «торонто вә мәкмастер университетлирида йүз бәргән вәқәләр билән канададики хитай әлчиханиси вә консулханилириниң һечқандақ алақиси йоқлуқи» ни илгири сүргән. Мәзкур вәқә уйғур тәшкилатлириниң диққитини қозғиған. Д у қ 18‏-феврал баянат елан қилип, канада һөкүмитини уйғур паалийәтчилириниң пикир әркинлики вә бихәтәрликини қоғдашқа чақирған.

Пикирләр (0)
Share
Толуқ бәт