Өзбекистан сабиқ президент кәримофниң қизи гулнарани қолға алған

Мухбиримиз әркин
2017-07-28
Елхәт
Пикир
Share
Принт

Өзбекистан һөкүмити өзбекистан сабиқ президенти ислам кәримофниң чоң қизи гүлнара кәримованиң сотлинип, нәзәрбәнд қилинғанлиқини елан қилди.

Өзбекистан баш тәптиш мәһкимисиниң җүмә күни билдүрүшичә, гүлнара кишиләргә селиқ селиш, башқиларниң мүлкини өзиниң қиливелиш вә башқа җинайәтләр билән әйиблинип сотланған вә 5 йиллиқ қамақ җазаси берилип нәзәрбәнд қилинған. Бу, өзбекистан әдлийә тармақлириниң тунҗи қетим 45 яшлиқ гүлнара кәримованиң әһвалидин учур беришидур. Униң 2014‏-йили дадиси билән болған мунасивити бузулуп, шуниңдин бери у өзбекистан ахбарат вә аммиви сорунлиридин ғайиб болған иди.

Ройтерс агентлиқиниң хәвиридә, өзбекистан тәптиш даирилириниң гүлнараниң шветсарийә, шиветсийә, әнглийә, фирансийә, латвийә, иреландийә, малта, германийә, хоңкоң, русийә, бирләшмә әрәб әмирлики қатарлиқ дөләт вә районлардики бир милярд 500 милйон долларлиқ мал-мүлкини тоңлитишқа киришкәнликини билдүргән.

Өзбекистан тәптиш әмәлдарлириниң қәйт қилишичә, гүлнара 2015‏-йили селиқ селиш, хәқниң мүлкини өзини қиливелиш, баҗ оғрилаш җинайити билән сотланған вә 5 йиллиқ нәзәрбәнд қилиш җазаси берилгән. Даириләр йәнә, униң алдамчилиқ, таможнидин атлап өтүш, чәтәл перевот қануниға хилаплиқ қилиш, пул ююш қатарлиқ җинайәтләр билән тәкшүрүлгәнликини вә сотлиниш басқучида туруватқанлиқини билдүргән.

Гүлнара илгири өзбекистандики әң күчлүк содигәр, сиясийон вә кәримофниң избасари дәп қарилип кәлгән. Әмма шуниң билән биргә, у кишилик һоқуқ тәшкилатлириниң вә өзбек өктичилириниң қаттиқ қаршилиқиға учрап кәлгән шәхс иди.

Даириләр у 2014‏-йили ғайиб болғандин тартип һазирға қәдәр униң әһвалидин һечқандақ учур берип бақмиған. У дадиси, сабиқ президент кәримоф 2016‏-йили сентәбирдә меңисигә қан чүшүп өлгәндиму, униң җиназә мурасимиға қатнаштурулмиған. Шиветсийә тәптиш даирилири 2014‏-йили униң үстидин пул ююш җинайи билән тәкшүрүш башлиған иди.

Пикирләр (0)
Share
Толуқ бәт