Пакистан билән афғанистан хитай билән «террорлуққа» қарши һәмкарлиқни күчәйтидиғанлиқини билдүрди

Мухбиримиз әркин
2019-09-09
Елхәт
Пикир
Share
Принт

Пакистан, афғанистан, хитай өткән һәптиниң ахири пакистанда «3 тәрәп диалоги» министирлар йиғини өткүзүп, «террорлуқ» ниң һәр хил шәкил вә аламәтлиригә қарши һәмкарлиқни күчәйтидиғанлиқини билдүргән.

Йиғинда бу 3 дөләт һәрқандақ бир «террорлуқ» тәшкилати, елементи яки шәхсниң өз туприқида башқа биригә қарши паалийәт елип беришиға йол қоймайдиғанлиқини тәкитлигән.

Пакистан таратқулириниң хәвәр қилишичә, бу һәмкарлиқ вәдиси пакистан, афғанистан вә хитай ташқи ишлар министирлириниң 7-сентәбир күни ислам-абатта өткүзүлгән «3 тәрәп диалоги» ниң ахбарат йиғинида оттуриға қоюлған.

3‏-Нөвәтлик пакистан, афғанистан вә хитай «3 тәрәп диалоги» бу қетим пакистанниң саһибханилиқида өткүзүлгәниди.

Пакистанниң «хәвәрләр» ториниң ашкарилишичә, йиғинда хитай ташқи ишлар министири ваң йи, афғанистан ташқи ишлар министири салаһиддин рабани вә пакистан ташқи ишлар министири шаһ мәһмуд қурәши афғанистан, тинчлиқ сөһбити вә униң қайта-яришишини алға сүридиғанлиқи, хитайниң «бир бәлвағ, бир йол пилани» ни қоллайдиғанлиқи, шундақла үч тәрәпниң кабулда өткүзүлгән 2‏-нөвәтлик «3 тәрәп диалоги» да мақулланған террорлуққа қарши һәмкарлиқ қарарлирини үнүмлүк әмәлийләштүрүп, «шәрқий түркистан ислам һәрикити вә униң қоллиғучи һәм ярдәм қилғучилириға қарши күрәш қилишниң зөрүрлүкини етирап қилидиғанлиқи» ни билдүргән.

Афғанистан билән пакистанниң хитай һөкүмити «террорлуққа қарши туруш», «радикаллиқ» ни түгитиш намида 2 милйондәк уйғур вә башқа мусулман хәлқләрни йиғивелиш лагерлириға қамап, уйғурларни өзиниң диний етиқади вә мәдәнийитини инкар қилишқа қиставатқан мәзгилдә хитайға бу вәдиләрни бериши диққәт қозғимақта. Кишилик һоқуқни қоғдиғучилар илгири өзлирини мусулманларниң «һаммиси» дәп келиватқан пакистандәк ислам дөләтлириниң уйғур районидики кишилик һоқуқ дәпсәндичиликигә көз юмуп, хитайниң уйғурларни давамлиқ бастурушиға йешил чирағ йеқип бериватқанлиқини илгири сүрүп кәлди.

Пикирләр (0)
Share
Толуқ бәт