Хитай-пакистан мунасивитиниң тәрәққиятиға баһа берилди

Мухбиримиз әзиз
2016-04-28
Елхәт
Пикир
Share
Принт

Пакистандики «күндилик вақит гезити» ниң хәвиригә қариғанда, пакистанниң б д т да турушлуқ баш әлчиси лоди 28-апрел күни харвард университетида сөзлигән нутқида «хитай билән пакистанниң мунасивити тарихий, истратегийәлик вә көңүл ағриқидин хали рәвиштә, шундақла пакистан ташқи сияситиниң мәркизий нуқтиси болуш сүпитидә давам қилмақта» дегән.

Хәвәрдә ейтилишичә, лоди сөзидә «иқтисадий гүллиниш һәмдә пакистан вә униңға қошна районлардики террорлуқ вә зорлуқ һәрикәтлирини ахирлаштуруш һазирқи пакистан үчүн алдинқи қатардики вәзипиләр» дәп көрсәткән. У мисал тәриқисидә уйғурлар райони билән пакистанни туташтуруш мәқситидә қурулған «пакистан -хитай иқтисадий каридори» ни тилға елип, буниң районлар-ара иқтисадни гүлләндүрүштә зор әһмийәткә игә икәнликини тәкитлигән.

Ройтерс агентлиқи хитай билән пакистан оттурисида изчил йүксиливатқан достлуқ мунасивити һәққидә тохтилип, пакистанниң хитайдин әң көп қорал сетивалғучи дөләт икәнликини, шундақла хитай һөкүмитиниң уйғурлар районини тинчитиш үчүн пакистанниң қоллишиға вә ярдимигә моһтаҗ болуватқанлиқини тилға алған.
Обзорда көрситилишичә, хитай һөкүмити хитай-пакистан мунасивитини «һәсәлдинму шерин» вә «полаттинму мустәһкәм» дәп тәсвирлимәктә икән.

Өткән йили хитай һөкүмити әрәб деңизи бойидин башлинип һималая теғи арқилиқ уйғурлар дияриға тутишидиған 1800 мил (тәхминән 3000 километир) узунлуқтики юқири сүрәтлик ташйол вә төмүрйол қурулушиға мәбләғ салидиғанлиқини җакарлиған. Шуниң билән биргә, хитай йәнә пакистандин қәшқәргә тутишидиған нефит турубиси қурулушиға мәбләғ салидиғанлиқини билдүргән иди.

Анализчилар бирдәк, икки дөләт оттурисидики ешип бериватқан һәмкарлиқ мунасивитидә достлуққа әмәс, бәлки мәнпәәт мәсилисигә бәкрәк көңүл бөлмәктә, дәп қаримақта.

Пикирләр (0)
Share
Толуқ бәт