Xitay-pakistan munasiwitining tereqqiyatigha baha bérildi

Muxbirimiz eziz
2016-04-28
Élxet
Pikir
Share
Print

Pakistandiki "Kündilik waqit géziti" ning xewirige qarighanda, pakistanning b d t da turushluq bash elchisi lodi 28-aprél küni xarward uniwérsitétida sözligen nutqida "Xitay bilen pakistanning munasiwiti tarixiy, istratégiyelik we köngül aghriqidin xali rewishte, shundaqla pakistan tashqi siyasitining merkiziy nuqtisi bolush süpitide dawam qilmaqta" dégen.

Xewerde éytilishiche, lodi sözide "Iqtisadiy güllinish hemde pakistan we uninggha qoshna rayonlardiki térrorluq we zorluq heriketlirini axirlashturush hazirqi pakistan üchün aldinqi qatardiki wezipiler" dep körsetken. U misal teriqiside Uyghurlar rayoni bilen pakistanni tutashturush meqsitide qurulghan "Pakistan -xitay iqtisadiy karidori" ni tilgha élip, buning rayonlar-ara iqtisadni güllendürüshte zor ehmiyetke ige ikenlikini tekitligen.

Roytérs agéntliqi xitay bilen pakistan otturisida izchil yüksiliwatqan dostluq munasiwiti heqqide toxtilip, pakistanning xitaydin eng köp qoral sétiwalghuchi dölet ikenlikini, shundaqla xitay hökümitining Uyghurlar rayonini tinchitish üchün pakistanning qollishigha we yardimige mohtaj boluwatqanliqini tilgha alghan.
Obzorda körsitilishiche, xitay hökümiti xitay-pakistan munasiwitini "Heseldinmu shérin" we "Polattinmu mustehkem" dep teswirlimekte iken.

Ötken yili xitay hökümiti ereb déngizi boyidin bashlinip himalaya téghi arqiliq Uyghurlar diyarigha tutishidighan 1800 mil (texminen 3000 kilométir) uzunluqtiki yuqiri sür'etlik tashyol we tömüryol qurulushigha meblegh salidighanliqini jakarlighan. Shuning bilen birge, xitay yene pakistandin qeshqerge tutishidighan néfit turubisi qurulushigha meblegh salidighanliqini bildürgen idi.

Analizchilar birdek, ikki dölet otturisidiki éship bériwatqan hemkarliq munasiwitide dostluqqa emes, belki menpe'et mesilisige bekrek köngül bölmekte, dep qarimaqta.

Toluq bet