Әл җәзирә: «пакистан һөкүмити пакистанлиқ уйғурларниң һәқ-һоқуқиға көз юммақта»

Мухбиримиз әркин
2019-01-14
Елхәт
Пикир
Share
Принт

Қатарниң «әл җәзирә» телевизийә қанилиниң 14‏-январ күни пакистандики уйғурлар һәққидә бәргән хәвиридә пакистан һөкүмитиниң хитай билән болған мунасивитини дәп пакистандики уйғурларниң һәқ-һоқуқини қоғдимайватқанлиқи илгири сүрүлди. «Әл җәзирә» телевизийә қанили пакистандики бәзи йәрлик уйғур тиҗарәтчиләрни зиярәт қилип, уларниң пакистандики әһвалини тонуштурған. Бу йәрдики уйғурларниң билдүрүшичә, «хитай пакистанға бесим ишлитип, униң сияситини тәнқид қилғучиларни җимиқтурмақта» икән. Равалпиндида олтурушлуқ уйғур тиҗарәтчи абдулһәмит әлҗәзирәниң мухбириға өзлириниң пакистанда өз арзуси бойичә һечнемә қилалмайдиғанлиқи, «чүнки, хитайниң уларниң пешидила йүридиғанлиқи» ни ейтқан. Абдулһәмитниң дадиси буниңдин 50 йил аввал равалпиндиға келип, бу йәрдики уйғур һаҗиларни күтүвалидиған бир рабатта ишлигән. Һалбуки, бу рабат 2006‏-йили хитайниң тәлипигә бинаән тақиветилгән. Абдулһәмитниң «әл җәзирә» телевизийиси мухбириға билдүрүшичә, нөвәттә униң җәмәтидин инисини өз ичигә алған 300 дәк туғқини лагерда икән. Равалпиндида олтурушлуқ йәнә бир уйғур тиҗарәтчи абдулләтиф өзиниң уйғур районидики уруқ-туғқанлири билән болған алақисиниң пүтүнләй үзүлгәнлики, чүнки, уруқ-туғқанлириға телефон урса, бу уларниң тутқун қилинишиға сәвәб болидиғанлиқини билдүргән. Униң илгири сүрүшичә, һазир уйғур районида «бирәр адәм өлсә, һечким униң намизини чүшүрүшкә петиналмайдикән».

Равалпиндидики йәнә бир уйғур тиҗарәтчи абдуреһим «әл җәзирә» ниң мухбириға, пакистандики уйғурларниң паракәндичилик вә тәһдиткә учриши адәттики мәсилигә айлинип қалғанлиқини билдүргән. Униң қәйт қилишичә, хитай һөкүмити пакистандики уйғурлар арқилиқ уйғурларни контрол қилипла қалмай, пакистан һөкүмити арқилиқму контрол қилмақта икән. У: «бу йәрдики мәсилә шу, хитай пакистан һөкүмитигә бесим қилиду. Пакистан һөкүмити бизгә бесим ишлитиду. Шуниң билән биз уйғурларниң мәсилисини таратқуларға сөзлийәлмәс болдуқ» дегән. «Әл җәзирә» ниң хәвиридә йәнә америкадики вилсон мәркизи асия программисиниң директори майкел кугелманниң сөзи нәқил кәлтүрүлгән. Кугелмәнниң илгири сүрүшичә, «хитай, уйғурларниң тәқдири зор мәсилигә айлинип, униң йәршари образиға сәлбий тәсир пәйда қиливатқанлиқини билидикән. Шуңа у пакистандики уйғурларниң бу йәрдики ниспий сөз әркинликидин пайдилинип, техиму диққәт қозғишини халимайдикән».

Пикирләр (0)
Share
Толуқ бәт