Xitay Uyghur rayonidiki doxturxanilarning pilanliq tughut qurulushigha 4 milyard 790 ming som meblegh saldi

Muxbirimiz méhriban
2015-06-30
Élxet
Pikir
Share
Print

Chet'ellerdiki Uyghur teshkilatliri, xelq'ara kishilik hoquq teshkilatliri we gherb démokratik dölet hökümetliri xitayning Uyghurlargha qaratqan pilanliq tughut siyasitini eyiblewatqan shara'itta, xitay hökümitining Uyghur aptonom rayonining sehiye pilanliq tughut qurulushigha yene zor kölemde meblegh sélishi diqqet qozghidi.

Xitayning junggo xewerler torining yéqinqi xewiride "Shinjanggha yardem" programmisigha qatnashqan 19 ölke, sheherning yéngi besh yilliq pilanda, Uyghur rayonidiki pilanliq tughut qurulushigha 4 milyard 790 milyon som meblegh salghanliqini, 2015-yilning aldinqi yérim yilighiche bu mebleghning 90% emeliyleshtürülüp, Uyghur aptonom rayonidiki sehiye pilanliq tughut esliheliri yéngilandi, dep xewer bérildi. Xewerde yene, Uyghur aptonom rayonluq partkomning da'imiy hey'et ezasi xanibat sabirning "Sehiye we pilanliq tughut eslihelirini yaxshilap, bu jehettiki xizmetlerni ching tutush shinjangning ijtima'iy muqimliqi we uzun muddet eminlikige zor töhpe qoshidu" dégen sözliri neqil élin'ghan.

Xitay xewiride "Rayondiki sehiye pilanliq tughut qurulushigha sélin'ghan 4 milyard 790 milyon som mebleghning 351 doxturxana we dawalash ponkitidiki qurulush türige sélin'ghanliqini, nöwette xébiy, jyangshi ölkilirining rayondiki deslepki qurulushliri tamamlan'ghanliqi tilgha élindi. Xewerde rayondiki sehiye pilanliq tughut eslihelirige sélin'ghan mebleghning köpeytilip, bu sahediki téxnikilar yaxshilan'ghanliqi alahide eskertilgen. Halbuki dunya Uyghur qurultiyi we xelq'ara kishilik hoquq teshkilatliri xitayning Uyghurlargha qaratqan siyasitini tenqidligende "Xitayning rayonda élip bériwatqan pilanliq tughut siyasiti Uyghurlarning nopusini azaytish siyasitidin ibaret" dep eyiblep kelmekte.

Toluq bet