Кишилик һоқуқни көзитиш тәшкилати «дуня кулублар потбул лоңқиси мусабиқиси» ниң хитайға берилгәнликини тәнқид қилди

Мухбиримиз әркин
2019-11-28
Елхәт
Пикир
Share
Принт

Кишилик һоқуқ көзитиш тәшкилати 27-ноябир күни баянат елан қилип, хәлқара потбул бирләшмисиниң 2021‏-йиллиқ «дуня кулублар потбул лоңқиси мусабиқиси» ниң саһибханилиқини уйғурларни дәпсәндә қиливатқан хитайдәк бир дөләткә бериши униң өзиниң кишилик һоқуқ әһдилиригә хилап икәнликини билдүргән.

Кишилик һоқуқни көзитиш тәшкилатиниң илгири сүрүшичә, хәлқара потбул бирләшмиси мәзкур мәсилисидә кишилик һоқуқни бир чәткә қайрип қойған. Хәлқара потбул бирләшмиси бу йил 24‏-өктәбир күни шаңхәйдә йиғин чақирип, 2021‏-йиллиқ «дуня потбул кулублар лоңқиси мусабиқиси» ниң шаңхәйдә өткүзүлидиғанлиқини елан қилған.

Хәлқара потбул бирләшмисиниң 2 милйондәк уйғур хитайниң йиғивелиш лагерлириға қамилип, хитай карханилирида мәҗбурий әмгәккә селиниватқан мәзгилдә саһибханилиқни хитайға бериши хәлқарада қаттиқ ғулғула қозғиған. Лекин хәлқара потбул бирләшмисиниң рәиси һигияни инфәнтино саһипханлиқниң хитайға берилгәнликини ақлиған иди.

Кишилик һоқуқни көзитиш тәшкилатиниң баянатида униң йәр шари ишлириға мәсул директори минкий ворден «хәлқара потбул бирләшмиси дуня кулублар мусабиқисиниң саһибханилиқини хитайға берип, өзиниң кишилик һоқуқ әһдисигә хилаплиқ қилди» дегән. Баянатта тәкитлишичә, «кишилик һоқуқ тәшкилатлири вә таратқулар ашкарилиғандәк хитай һөкүмити әмгәк һоқуқини суйиистемал қилиш, кәң көләмлик тутқун қилиш, омумйүзлүк назарәт қилиш, тән җазаси, журналистларни чәкләш вә шинҗаңдики ‹сиясий тәрбийәләш лагерлири' да бир милйондин артуқ уйғур вә башқа мусулман аз санлиқ милләтләргә қопал муамилә қилишни өз ичигә алған еғир кишилик һоқуқ дәпсәндичилики садир қиливатқан болуп, бу хил суйиистемал дуня кулублар потбул мусабиқисигә қатнишидиған тәнтәрбийәчиләргә, потбул мәстанилиригә, хизмәтчи хадимларға, журналистлар вә башқа гуруппиларға биваситә тәсир қилидикән.»

Хәлқара потбул бирләшмиси чәтәлдики уйғурлар һәрикәт қозғап, 2022‏-йиллиқ бейҗиң қишлиқ олимпик мусабиқисини байқут қилишни тәләп қиливатқан мәзгилдә дуня кулублар потбул мусабиқисини шаңхәйгә бәргән иди.

Пикирләр (0)
Share
Толуқ бәт