Kishilik hoquqni közitish teshkilati "Dunya kulublar potbul longqisi musabiqisi" ning xitaygha bérilgenlikini tenqid qildi

Muxbirimiz erkin
2019-11-28
Élxet
Pikir
Share
Print

Kishilik hoquq közitish teshkilati 27-noyabir küni bayanat élan qilip, xelq'ara potbul birleshmisining 2021‏-yilliq "Dunya kulublar potbul longqisi musabiqisi" ning sahibxaniliqini Uyghurlarni depsende qiliwatqan xitaydek bir döletke bérishi uning özining kishilik hoquq ehdilirige xilap ikenlikini bildürgen.

Kishilik hoquqni közitish teshkilatining ilgiri sürüshiche, xelq'ara potbul birleshmisi mezkur mesiliside kishilik hoquqni bir chetke qayrip qoyghan. Xelq'ara potbul birleshmisi bu yil 24‏-öktebir küni shangxeyde yighin chaqirip, 2021‏-yilliq "Dunya potbul kulublar longqisi musabiqisi" ning shangxeyde ötküzülidighanliqini élan qilghan.

Xelq'ara potbul birleshmisining 2 milyondek Uyghur xitayning yighiwélish lagérlirigha qamilip, xitay karxanilirida mejburiy emgekke séliniwatqan mezgilde sahibxaniliqni xitaygha bérishi xelq'arada qattiq ghulghula qozghighan. Lékin xelq'ara potbul birleshmisining re'isi higiyani infentino sahipxanliqning xitaygha bérilgenlikini aqlighan idi.

Kishilik hoquqni közitish teshkilatining bayanatida uning yer shari ishlirigha mes'ul diréktori minkiy wordén "Xelq'ara potbul birleshmisi dunya kulublar musabiqisining sahibxaniliqini xitaygha bérip, özining kishilik hoquq ehdisige xilapliq qildi" dégen. Bayanatta tekitlishiche, "Kishilik hoquq teshkilatliri we taratqular ashkarilighandek xitay hökümiti emgek hoquqini suyi'istémal qilish, keng kölemlik tutqun qilish, omumyüzlük nazaret qilish, ten jazasi, zhurnalistlarni cheklesh we shinjangdiki 'siyasiy terbiyelesh lagérliri' da bir milyondin artuq Uyghur we bashqa musulman az sanliq milletlerge qopal mu'amile qilishni öz ichige alghan éghir kishilik hoquq depsendichiliki sadir qiliwatqan bolup, bu xil suyi'istémal dunya kulublar potbul musabiqisige qatnishidighan tenterbiyechilerge, potbul mestanilirige, xizmetchi xadimlargha, zhurnalistlar we bashqa guruppilargha biwasite tesir qilidiken."

Xelq'ara potbul birleshmisi chet'eldiki Uyghurlar heriket qozghap, 2022‏-yilliq béyjing qishliq olimpik musabiqisini bayqut qilishni telep qiliwatqan mezgilde dunya kulublar potbul musabiqisini shangxeyge bergen idi.

Toluq bet