Хитай даирилири «қанунсиз учур тарқитиш» қа четишлиқ 13 адәмни җазалиған

Мухбиримиз сада
2019-08-07
Елхәт
Пикир
Share
Принт

Хитай даирилири уйғур аптоном райониниң үрүмчи, ғулҗа, бортала, ақсу вә қәшқәр қатарлиқ җайлирида «қанунсиз учур тарқитиш» қа алақидар сәккиз типик дело вә униңға четишлиқ 13 адәмни җазалиған.

«Тәңритағ» ториниң 7-июлдики хәвиригә қариғанда, юқириқи кишиләр «интернет вә башқа иҗтимаий алақә супилирида диний ашқунлуқ, бөлгүнчилик вә сахта учур қатарлиқ мәзмунлардики йезиқ, рәсим, син көрүнүшлирини тарқитип вә сақлиғанлиқи» һәмдә хитайниң «җинайи ишлар қануни», «террорлуққа қарши туруш қануни», «аманлиқ сақлаш ишлири бойичә башқуруш вә җазалаш қануни» вә «интернет учур мулазимитини башқуруш чариси» қатарлиқ қанун-низамларға хилаплиқ қилғанлиқи билән әйибләнгән икән.

Мәзкур хәвәрдә дейилишичә, бу қетим «қанунсиз учур тарқитиш» билән җазаланған 13 кишиниң үч нәпири уйғур, 10 нәпири хитай икән. Буларниң икки нәпири «милләтләр ара өчмәнликкә күшкүртүш», «диний ашқунлуққа мунасивәтлик буюмларни тарқитиш» дегән намда җинайи ишлар бойичә тохтитип қоюлған, йәнә биригә тәнқидий тәрбийә җазаси берилгән.

Җинайи ишлар бойичә тохтитип қоюлған бу икки уйғур ғулҗидин болуп, бири 19 яш йәнә бири 35 яш икән. Хәвәрдә уларниң бу йил 22-апрел вә 11-май күнлири өзиниң шәхсий иҗтимаий алақә суписида «милләтләр ара өчмәнликкә күшкүртүш» кә даир сөз-җүмлиләрни қилиш вә «ашқун идийәни тәшвиқ қилидиған сүрәтлик учурларни тарқитиш» билән әйибләнгән.

Мәлум болушичә, буниңдин илгириму хитай даирилири уйғурларни интернетта «қанунсиз учур тарқатқан» дегән намда җазалиған болуп, бу хитай даирилириниң уйғур диярида «қанунсиз учур тарқитиш» билән җазаланғанлиқини елан қилған 22-түркүмдики типик дело икән.

Пикирләр (0)
Share
Толуқ бәт