Шиветсийә уйғурларни хитайға қайтурушни вақитлиқ тохтатқан

Мухбиримиз әркин
2018-09-24
Елхәт
Пикир
Share
Принт

Шиветсийә көчмәнләр даирилири уйғур райониниң нөвәттики җиддий вәзийитини көздә тутуп, шиветсийәдин панаһлиқ сорап рәт қилинған уйғурларни хитайға қайтурушни вақитлиқ тохтатқан.

Шиветсийә уйғурларни хитайға қайтурушни тохтитишни буйруған явропадики 2‏-дөләттур. Өткән айда германийә ички ишлар министирлики көчмәнләр идарисигә буйруқ чүшүрүп, уйғурларни хитайға қайтурушни тохтитишни тәләп қилған. Германийә бу йил 4‏-айда 22 яшлиқ бир уйғурни хитайға хата қайтурувәткәндин кейин бу қарарни чиқарған иди. Шиветсийә көчмәнләр даирилириниң билдүрүшичә, улар уйғурларниң һазирқи вәзийитигә қарап юқириқи қарарни чиқарған.

Фирансийә агентлиқиниң дүшәнбә күни бәргән хәвиридә шиветсийә көчмәнләр идарисиниң бу һәқтики баянати нәқил кәлтүрүлгән болуп, баянатта «бир қанчә кишилик һоқуқ тәшкилатидин еришкән учурлар уйғурларниң вәзийитиниң бәк начарлишип кәткәнликини көрсәткәнлики» тәкитләнгән. Шиветсийә көчмәнләр идариси баянатчисиниң көрситишичә, «бу қарар йәнә хитайға қайтурулуши қарар қилинған шинҗаңдики башқа аз санлиқ милләтләргиму иҗра қилинидикән».

Йеқинда шиветсийә көчмәнләр идариси бир уйғур аилиниң сиясий панаһлиқ тәлипини рәт қилип, уларниң хитайға қайтип кетишини тәләп қилған. Абдуқадир исимлик бир уйғур мусапир билән униң еғир аяқ аяли вә икки балиси хитайға қайтип кәтсә йиғивелиш лагериға қамилиш, қамақ җазасиға һөкүм қилиниш яки из-дерәксиз ғайиб болуш хәвпигә дуч кәлгән. Шиветсийә даирилириниң қарари кишилик һоқуқ тәшкилатлириниң қаршилиқиға учриған.

Хәлқара кәчүрүм тәшкилати шиветсийә даирилириниң абдуқадир вә униң аилисини қайтуруш қарарини иҗра қилишни тохтитишни тәләп қилип, әгәр улар қайтурулса һаяти еғир хәвпкә учрайдиғанлиқини агаһландурған иди. Көчмәнләр даирилириниң қарари қанчилик уйғурға тәсир қилидиғанлиқи ениқ болмисиму, лекин абдуқадир вә униң аилисиниң қайтурулмайдиғанлиқидин униң қайта сиясий панаһлиққа илтимас сунуш пурсити туғулғанлиқи мәлум.

Пикирләр (0)
Share
Толуқ бәт