Shiwétsiye Uyghurlarni xitaygha qayturushni waqitliq toxtatqan

Muxbirimiz erkin
2018-09-24
Élxet
Pikir
Share
Print

Shiwétsiye köchmenler da'iriliri Uyghur rayonining nöwettiki jiddiy weziyitini közde tutup, shiwétsiyedin panahliq sorap ret qilin'ghan Uyghurlarni xitaygha qayturushni waqitliq toxtatqan.

Shiwétsiye Uyghurlarni xitaygha qayturushni toxtitishni buyrughan yawropadiki 2‏-dölettur. Ötken ayda gérmaniye ichki ishlar ministirliki köchmenler idarisige buyruq chüshürüp, Uyghurlarni xitaygha qayturushni toxtitishni telep qilghan. Gérmaniye bu yil 4‏-ayda 22 yashliq bir Uyghurni xitaygha xata qayturuwetkendin kéyin bu qararni chiqarghan idi. Shiwétsiye köchmenler da'irilirining bildürüshiche, ular Uyghurlarning hazirqi weziyitige qarap yuqiriqi qararni chiqarghan.

Firansiye agéntliqining düshenbe küni bergen xewiride shiwétsiye köchmenler idarisining bu heqtiki bayanati neqil keltürülgen bolup, bayanatta "Bir qanche kishilik hoquq teshkilatidin érishken uchurlar Uyghurlarning weziyitining bek nacharliship ketkenlikini körsetkenliki" tekitlen'gen. Shiwétsiye köchmenler idarisi bayanatchisining körsitishiche, "Bu qarar yene xitaygha qayturulushi qarar qilin'ghan shinjangdiki bashqa az sanliq milletlergimu ijra qilinidiken".

Yéqinda shiwétsiye köchmenler idarisi bir Uyghur a'ilining siyasiy panahliq telipini ret qilip, ularning xitaygha qaytip kétishini telep qilghan. Abduqadir isimlik bir Uyghur musapir bilen uning éghir ayaq ayali we ikki balisi xitaygha qaytip ketse yighiwélish lagérigha qamilish, qamaq jazasigha höküm qilinish yaki iz-déreksiz ghayib bolush xewpige duch kelgen. Shiwétsiye da'irilirining qarari kishilik hoquq teshkilatlirining qarshiliqigha uchrighan.

Xelq'ara kechürüm teshkilati shiwétsiye da'irilirining abduqadir we uning a'ilisini qayturush qararini ijra qilishni toxtitishni telep qilip, eger ular qayturulsa hayati éghir xewpke uchraydighanliqini agahlandurghan idi. Köchmenler da'irilirining qarari qanchilik Uyghurgha tesir qilidighanliqi éniq bolmisimu, lékin abduqadir we uning a'ilisining qayturulmaydighanliqidin uning qayta siyasiy panahliqqa iltimas sunush pursiti tughulghanliqi melum.

Toluq bet