Hindonéziyediki 3 neper Uyghurning buningdin bir qanche kün awwal xitaygha ötküzüp bérilgenliki ilgiri sürülmekte

Muxbirimiz erkin
2020-10-30
Élxet
Pikir
Share
Print

Hindonéziyede qamaq jazasi toshup qoyup bérilgen 3 neper Uyghurning amérika tashqi ishlar ministiri mayk pompéyo hindonéziyege kélishtin 2-3 kün burun xitaygha ötküzüp bérilgenliki ilgiri sürülmekte.

"Jenubiy xitay etigenlik pochtisi" gézitining 30-öktebir xewer qilishiche, ismini ashkarilashni xalimaydighan bir hindonéziye bixeterlik emeldari 3 neper Uyghurning mayk pompéyo kélishtin 2-3 kün awwal "Xitay hökümitining bir mexsus ayropilanida xitaygha qayturulghanliqi" ni bildürgen. Amérika tashqi ishlar ministiri mayk pompéyo hindonéziye ziyaritide hindonéziye musulmanlirini xitayning Uyghurlarni basturushigha qarshi heq meydanda turushqa chaqirghan.

U 29-öktebir hindonéziyediki bir musulmanlar teshkilatining yashlirigha nutuq sözlep, musulmanlarni "Yürikige qolini sélip béqishqa, pakitlargha qarashqa, qirghinchiliqtin aman qalghanlar we ularning a'ilisidikilerning kechmishini anglap béqishqa" chaqirghan idi. Lékin "Jenubiy xitay etigenlik pochtisi" ning tekitlishiche, hindonéziye bixeterlik emeldari xitay bilen türkiyedin bu ücheylenning öz puqraliri ikenlikini ispatlishini telep qilghanliqi, "Peqet xitayla ularning hazirmu shinjangda yashawatqan uruq-tughqanlirining d n a ewrishkisi bilen teminligenliki" ni bildürgen.

Bu emeldarning tekitlishiche, "Ularning xitay puqrasi ikenliki ispatlan'ghanliqi üchün xitaygha qayturulghan iken." lékin kishilik hoquqni közitish teshkilati hindonéziye hökümitining bu qararini "Rehimsizlik" dep eyibligen. Mezkur teshkilatning asiya ishliri diréktori bred adams: "Hindonéziye hökümiti xitay hökümitining Uyghurlargha da'im ziyankeshlik qilidighanliqini bilidu. Halbuki, ular bu kishilerni ziyankeshlikke uchrashtin qoghdash mes'uliyitining ornigha rehimsiz bir qarar chiqarghandek qilidu," dégen.

Toluq bet