Қәшқәр билән бир қисим чоң шәһәрләр арисида айропилан қатниши йолға қоюлди

Мухбиримиз үмидвар
2017-03-19
Елхәт
Пикир
Share
Принт


Хитайниң җәнуби авиатсийә ширкити қәшқәр билән бир қисим ичкири хитай шәһәрлири арисида һава қатнишини көпәйтишни қарар қилған.

Хитай учур васитилиридин ашкарилинишичә, хитайниң җәнуби авиатсийә ширкити нуқтилиқ һалда қәшқәр базириға болған селинмини күчәйтип, үрүмчи-қәшқәр авиатсийә линийиси асасида йәнә қәшқәрдин хитайниң ичкири өлкилиригә қатнайдиған берип-келиш линийәсини көпәйтидикән. Мәсилән, 26-марттин башлап, қәшқәр-чеңду авиатсийә линийиси ечилип, нөвәттики авиатсийә линийиси техиму зичлаштурулуп, йолучиларниң еһтияҗи қандурулидикән.

Җәнуби авиатсийә ширкити йәнә йеңидин қәшқәр-корла-шиән берип-келиш линийиси вә қәшқәр-ақсу-җеңҗу линийиси ечишни қарар қилған.

Беләт баһасидиму етибар берилиш йолға қоюлуп, қәшқәрдин чеңдуға баридиған беләт баһаси 640 сомдин башлидинидикән.

Мәлум болушичә, җәнуби авиатсийә ширкити 26-марттин етибарән җеҗяңниң хаңҗу шәһири билән ақсу арисидики ақсу-үрүмчи-хаңҗу нөвәтчи айропиланлириниң учуш қетим санини көпәйтидиғанлиқини қарар қилған иди.

Һазир ақсу асаслиқи җеҗяң өлкисиниң ярдәм бериш нишанида болуп, ақсу вилайити тәвәсидики җеҗяңлиқ содигәрләрниң саниму көпләп ашқан вә улар вилайәт йәккә тиҗарәтлиридә муһим салмақни игилигән.

Қәшқәр вилайити болса асаслиқи гуаңдоң қатарлиқ өлкиләрниң«ярдәм бериш нишани»да болған.

Уйғур көзәткүчилириниң қаришичә, қәшқәр, ақсу, қатарлиқ шәһәрләр билән ичкири хитай шәһәрлири арисида мундақ айропилан қатнишини көпәйтиш әмәлийәттә бу җайлардики хитай көчмән аһалисиниң техиму ешиватқанлиқи, шуниңдәк даириләрниң қатнаш васитилирини яхшилаш арқилиқ қәшқәр қатарлиқ уйғур шәһәрлири билән ички хитай өлкилири арисидики алақини зичлаштуриватқанлиқини көрситидикән.

Пикирләр (0)
Share
Толуқ бәт