Бу йил қош тил маарипини күчәйтиш вә омумлаштуруш әң муһим вәзипә қатарида иҗра қилинидикән

Мухбиримиз ирадә
2017-01-25
Елхәт
Пикир
Share
Принт

Тәңритағ торидин берилгән хәвәрдин қариғанда, йәкшәнбә күни уйғур аптоном райони даирилири маарип хизмити йиғини чақирип, уйғур елиниң маарип хизмәтлиридики 13 нуқтилиқ хизмәтни бекитип чиққан болуп, уларниң асаслиқи қош тил маарипини омумлаштурушқа мунасивәтлик.

Бу маддилар ичидә әң асаслиқ орунда туридиғанлири қош тил йәсли маарипини омумлаштуруш, оттура-башланғуч мәктәпләр қош тил маарипини күчәйтиш вә шундақла қош тил оқутқучи сепини толуқлаш қатарлиқлардин ибарәт.

Уйғур аптоном район даирилири уйғур елиниң җәнубидики 3 вилайәт вә бир областни асас қилған җайларда қош тил йәслилирини омумлаштурушни уйғур елида мәңгүлүк әминлик бәрпа қилиштин ибарәт баш нишанниң асаслириниң бири икәнликини көрситип, уйғур балилирини йәслидин башлап, хитай тилида тәрбийәләшни асас қилидиған бу сиясәтни наразилиқларға қаримай күчәйтип иҗра қилмақта. Даириләр техи йеқинда 4387 йеза қош тил йәслисини көпәйтип қуридиғанлиқи вә кеңәйтидиғанлиқини шуниңдәк бу йилниң ахириғичә йезилардики йәслидә оқуватқан балиларниң санини 1 милйон 129 миңға йәткүзидиғанлиқини җакарлиған иди. Уйғур зиялийлири йәсли балилириға мәҗбурий иҗра қилиниватқан бу сиясәтниң уйғур ана тили вә миллий мәдәнийитидә өсүп йетилиши һәм уни раваҗландурушқа нисбәтән зор хәвп елип келидиғанлиқини билдүрүшмәктә.

Юқирида бекитилгән маарип хизмитидики 13 нуқтилиқ хизмәтләр ичидә йәнә, ичкири өлкиләрдики шинҗаң синиплирида оқуватқан оқуғучиларға қаритилған тәрбийиләш вә башқурушни күчәйтиш хизмитиму орун алған.

Пикирләр (0)
Share
Толуқ бәт