Xitay da'iriliri bu yil Uyghur rayonidiki "Qosh til" yeslilirige 10 ming oqutquchi qobul qilidu

Muxbirimiz erkin
2017-03-31
Élxet
Pikir
Share
Print

Xitay da'iriliri Uyghur rayonidiki 3 yilliq "Qosh til" yeslilirini dawamliq kéngeytip, uninggha téximu köp oqutquchi qobul qilishni qarar qilghan.

Xitay shinxu'a agéntliqining xewer qilishiche, Uyghur aptonom rayonluq ma'arip nazariti 2017‏-yili Uyghur rayonida 4387 "Qosh til" yeslisining yéngidin qurulidighanliqi yaki kéngeytip qurulup, 10 ming oqutquchi qobul qilinidighanliqini bildürgen.

Eger bu 10 ming "Qosh til" yesli oqutquchisi qobul qilinsa, bu ötken yildin bir hesse artuq qobul qilin'ghan bolidu. Da'iriler 2016‏-yili 3500 neper yesli oqutquchisi qobul qilghan. Ma'arip nazariti, "Qosh til" oqutquchilirini téximu köp terbiyilep, aliy mektep püttürgen oqughuchilarning "Qosh til" oqutquchisi bolushqa téximu köp righbetlendürülidighanliqini bildürgen.

Xitay hökümiti yéqinqi yillardin béri, Uyghurlarda "Qosh til" yesli ma'aripigha bolghan endishe kücheygenséri, uninggha meblegh sélishni ashurup, 2020‏-yilgha qeder "Qosh til" ma'aripini Uyghur aptonom rayonida omumlashturup bolushqa küchimekte. Xitay xelq qurultiyining bu yil 2‏-ayda chaqirilghan memliketlik yighinida bezi xitay wekiller Uyghur rayonida "Qosh til" ma'aripini dawamliq kücheytish teklipi sun'ghan.

Xitay re'isi shi jinping Uyghur rayoni wekillirining guruppa yighinigha qatnashqanda "Qosh til" ma'aripini kücheytishni tekitligen. Biraq xitayning "Qosh til" ma'aripi Uyghur ziyaliyliri we teshkilatlirini izchil endishige sélip kelgen. Ular, buning Uyghur ana til tereqqiyatini boghup, Uyghur milliy ma'aripini yoqitidighanliqini, Uyghur balilirini özining medeniyiti we en'eniliridin yiraqlashturidighanliqini agahlandurup kelgen.

Toluq bet