Рабийә қадир: «җаза лагерлиридики уйғурларниң түрмиләргә йөткилиши бир хәтәрлик һәрикәт»

Мухбиримиз сада
2018-10-10
Елхәт
Пикир
Share
Принт

Дуня уйғур қурултийиниң алий рәһбири рабийә қадир ханим 6-өктәбир, йәни шәнбә күни өзиниң тор бетидә уйғур дияридики тутқунларниң хитай өлкилиридики түрмиләргә йөткилишигә қарита әндишисини билдүрүп, бир парчә мақалә елан қилған.

Мәзкур мақалидә рабийә қадир ханим җаза лагерлириниң нөвәттики вәзийитиниң күнсери яманлишиватқанлиқи, нурғун тутқунларниң түрмиләргә йоллиниватқанлиқини баян қилған. У йәнә «әркин асия радиоси» да елан қилинған 2000 дәк уйғур тутқунниң хейлоңҗияң өлкисидики әң вәһший түрмә болған тәйләй түрмисигә мәхпий йөткәп кетилгәнлики һәққидики хәвәрниму алаһидә тилға алған.

Рабийә қадир ханим мақалисидә йәнә хитайниң йәр шаридики әң күчлүк дөләт болуш үчүн «бир йол, бир бәлвағ» пиланини оттуриға елип чиққанлиқини, әмма уйғурларни бу пиландики бир тосуқ дәп қарап келиватқанлиқини алаһидә тилға елип өткән. Шуниң билән биргә йәнә хитай һөкүмитиниң уйғурларға бир «вирус» орнида муамилә қилип, уни йилтизидин йоқ қиливетишкә урунуватқанлиқиниму әскәртип өткән.

Рабийә қадир ханим мақалисиниң ахирида хәлқара тәшкилатларни тездин һәрикәт қоллинишқа чақирған. У мундақ дәп язған: «мән хәлқара тәшкилатларни шәрқий түркистан диярида мустәқил тәкшүрүш елип берип, шу йәрдики җаза лагерлирини өз көзи билән көрүшкә, уйғур тутқунларниң хитайниң башқа өлкилиригә мәхпий һалда йөткилишини тосушқа чақириқ қилимән.»

Пикирләр (0)
Share
Толуқ бәт