Рус-хитай деңиз күчлири япон деңизида маневир өткүзиду

Мухбиримиз үмидвар
2017-09-17
Елхәт
Пикир
Share
Принт

Русийә билән хитай японийә әтрапида бирләшмә һәрбий маневир башлаш алдида турмақта, русийә агентлиқлиридин, «рус баһари» ниң ашкарилишичә, 18-дин 26-сентәбиргичә өткүзүлидиған мәзкур бирләшмә маневир русийәниң тинч окян флотиниң базисида елип берилидикән. Мәзкур бирләшмә маневирға русийә вә хитай тәрәп 11 су үсти вә икки су асти парахоти қатнаштуридиған болуп, буларниң һәммиси илғар вә яхши қоралланған һәрбий парахотлардур.

Булардин башқа йәнә һәрбий маневирға русийә деңиз армийисиниң алтә данә һәр хил айропиланлири вә хитайниң икки һәрбий айропилани қатнаштурулидикән.

«Деңиздики һәмкарлиқ 2017» дәп аталған мәзкур бирләшмә маневир өткүзүлидиған район икки бөләккә айрилған болуп, бир бөлики владивостоктики деңиз қирғиқида болуп, икки тәрәп деңиз армийисиниң қуруқлуқта җәң қилғучи қисимлири маневир өткүзидикән. Улар арқидин, 22-сентәбирдин башлап, охот деңизи вә япон деңизи районида маневир қилидикән.

Русийә-хитай деңиз армийисиниң бирләшмә маневири шималий корейә кризиси еғирлашқан, америка вә б д т ниң шимали корейәниң ядро синиқи елип беришини тохтитишни қаттиқ тәләп қиливатқан пәйткә тоғра кәлди. Пийоңяңниң москва вә бейҗиңниң кона иттипақчиси икәнлики тәкитлинип келингән иди.

Пикирләр (0)
Share
Толуқ бәт