Русийәниң сүрийәдики нишанларға қилған һава һуҗуми әндишә қозғиди

Мухбиримиз әркин
2015-10-01
Елхәт
Пикир
Share
Принт

Русийә ташқи ишлар министири лавроф пәйшәнбә күни русийә һава армийисиниң сүрийәдики нишанларға қаратқан һава һуҗумини ақлап, русийә уруш айропиланлириниң иттипақдаш күчләргә охшаш ислам дөлити нишанлирини бомбардиман қилғанлиқини илгири сүрди.

Бирақ иттипақдаш дөләтләр русийә һава һуҗуминиң нуқтилиқ өктичи күчләргә қаритилғанлиқидин, униң бу арқилиқ бәшәр әсәдкә ярдәм қиливатқанлиқидин әндишә қилишқа башлиди.

Әсәд һөкүмитигә қарши уруш қиливатқан өктичи қораллиқ күчләрниң пәйшәнбә күни билдүрүшичә, русийә пәйшәнбә күни сүрийәниң җиср әл-шуғур, хама, идлиб, хомс қатарлиқ районлиридики өктичиләр игиләп турған базиларни бомбардиман қилған.

Лива шуғур әл җабал қораллиқ өктичи гурупписиниң баянатчиси ройтерс агентлиқиға бәргән баянатида, русийә уруш айропиланлири бу гуруппиниң идлибдики базисиға башқурулидиған бомба атқанлиқини билдүргән.

Америка дөләт мудапиә министири аштон катер русийәни агаһландуруп, «униң һәрикити отқа бензин чачқанлиқ» деди. Ақ сарай баянатчиси җос ернист, русийә диққитини раст ислам дөлитигә мәркәзләштүрсә, у америка башчилиқидики иттипаққа һәссә қошқан болиду, дәп көрсәтти.

Русийәниң һәрикити йәнә түркийәни биарам қилған. Түркийә пәйшәнбә күни русийәниң һәрикитидин қаттиқ әндишә қиливатқанлиқини билдүргән. Бирақ русийә ташқи ишлар министири лавроф һава һуҗуми әсәдкә ярдәм беришни мәқсәт қилғанлиқини рәт қилип, «террорлуққа қарши уруш қиливатимиз»дегән.

Пикирләр (0)
Share
Толуқ бәт