Сақал қойған уйғурниң сотланғанлиқи һәққидә хәвәр язған хитай мухбир сөзидин йенивалди

Мухбиримиз меһрибан
2015-03-31
Елхәт
Пикир
Share
Принт

27-Март күни қәшқәр һөкүмәт хәвиридә «қәшқәрдә сот ечилип, сақал қойғанлиқи үчүн 38 яшлиқ яшлиқ мәмтимин исимлик уйғурға 6 йиллиқ қамақ җазаси, униң аялиға 2 йиллиқ қамақ җазаси берилгән» лики һәққидә хәвәр язған мухбир или чүншя, 31-март күни баянат елан қилип, хәвириниң хата болуп қалғанлиқини билдүрди.

Хитай мухбири или чүншя баянатида, «мән қәшқәр алаһидә район гезити мухбири или җүншя, 3-айниң 27-күни елан қилинған ‹қәшқәр шәһири бир түркүм кийиниши лаяқәтсиз, қанунсиз унсурларни бир тәрәп қилди' темилиқ хәвәрни, әстайидил чоңқур тәкшүрүп, ениқлаш елип бармайла йезип, әмәлийәткә уйғун болмиған хәвәрниң тарқилишиға сәвәбчи болдум, хәвәрниң һәқиқий болуш пиринсипиға мухалип иш қилдим. Шуниң үчүн кәң оқурмәнләрдин кәчүрүм сораймән» дәп язған.

27-Марттин башлап хитайниң һөкүмәт таратқулиридин «җуңго яшлар гезити» қатарлиқларда бу хәвәр көчүрүп тарқитилғандин кейин, чәтәлләрдики нопузлуқ таратқуларда «исламийәт йосунида сақал қоюп һиҗапланғини үчүнла уйғурларниң сотлиниватқанлиқи» һәққидә хәвәр анализлири кәң тарқалған. Чәтәлләрдики уйғур тәшкилатлири вә кишилик һоқуқ тәшкилатлири хитай һөкүмитини тәнқидләп бәргән баянатлирида «хитай даирилириниң уйғурларниң нормал диний етиқади вә диний кийиниш әркинликини чәкләпла қалмастин, сот арқилиқ қамаққа һөкүм қилиштәк еғир җазалаш сияситини йүргүзүши, әқәллий инсаний кишилик һоқуқни вә диний етиқад әркинликини әсәбийлик билән аяқ асти қилғанлиқ» дәп әйиблигән.

Хитай даирилири өткән йилниң бешидин башлап, уйғурларниң сақал қоюш вә һиҗаплинишини ашкара чәклигән. Бултур йил ахирида уйғур аптоном район даирилири йәнә алаһидә уқтуруш чиқирип, 2015-йил 1-январдин башлап «аммиви сорунларда аялларниң исламий йосунда һиҗаплиниши, 50 яштин төвән әрләрниң узун сақал қоюши чәклинидиғанлиқи, хилаплиқ қилғучиларниң қанун бойичә җазалинидиғанлиқи»ни елан қилғандин кейин, даириләрниң бу қарари хәлқарада күчлүк инкас қозғап тәнқидләшкә учриған иди.

Пикирләр (0)
Share
Толуқ бәт